Unioni i Gazetarëve të Shqipërisë ka ndarë çmimet vjetore për konkursin “Vangjush Gambeta” 2021 për gazetarët e ekonomisë.
Mes fituesve, gazetarja e TV Klan, Oljana Maloku është vlerësuar me çmimin “Vangjush Gambeta” për kronikën më të mire ekonomike televizive për 2021. Gazetarja Maloku mori këtë vlerësim për trajtimin profesional në emisionin “Pro Business” me fokus ekonominë në median Klan.
Po ashtu me çmime përpos gazetarëve në Shqipëri janë vlerësuar edhe gazetarët e fushës së ekonomisë në Kosovë dhe Maqedoninë e Veriut.
Kreu i Unionit, Aleksandër Çipa e konsideroi dhënien e këtyre çmimeve si një stimul për gazetarinë cilësore, ndërsa nxiti gazetarët për raportime profesionale të mëtejshme.
Në ceremoni mori pjesë edhe Kryetarja e Parlamentit Lindita Nikolla. Zonja Nikola vlerësoi lartë kontributin e gazetarëve, posaçërisht atyre të ekonomisë në informimin e opinionit me zhvillimet ekonomike dhe politike në vend dhe nënvizoi faktin se Unioni i Gazetarëve Shqiptar ka arritur që të bashkoj në këtë ceremoni gazetarët nga të gjitha trevat shqiptare.
Duke iu drejtuar të pranishmëve në emër të Japan Tobacco International i cili që 13 vjet përkrah ndarjen e çmimit “Vangjel Gambeta” Darija Dretar, theksoi se janë krenarë për rolin e rëndësishëm që kanë për komunitetin në Shqipëri dhe në Kosovë.
Juria e UGSH i dha Rita Behadini çmimin, për kronikën më të mirë në shtypin e shkruar në Maqedoninë Veriore, Elvin Luku për shkrimin më të mirë në shtypin e shkruar në Shqipëri dhe Albert Spahiu, për shkrimin më të mirë në shtypin e shkruar Kosovë. Çmimi “Raportimi më i mirë i vitit” i është ndarë Klodian Tomorri.
Çmimi “Reporteri i vitit” i është ndarë Jerola Zijai, ndërsa çmimi “Ismet Bellova “ për gazetarinë sportive i është ndarë Konstandin Grillo, port motrum.
Çmimin Karriera kanë marrë Ilva Tare dhe Seladin Xhezairi.
Ndarjes së çmimeve i ka paraprirë forumi “Pandemia dhe efektet mbi ekonominë”./ProBizz.al
