Probizz.al sjell historinë e radhës të suksesit. Ervis Trimi, një i ri me pasion i cili bën art në dru. Realizimet e produkteve janë unike, cilësore dhe të duhurat për arredimin e shtëpive, zyrave, restoranteve, bareve , hoteleve etj. Punishtja e tij ndodhet në Tiranë për këdo që dëshiron punime druri.
Ervis kur e nisët këtë profesion?
E gjitha ka nisur pas gjatë studimeve për Ing.Përpunim druri, të cilat më bënë të kuptoj veçantinë dhe bukurinë e drurit duke arritur në këtë mënyrë të zbuloj pasionin tim. Pas shkollimit, realizova një numër të kufizuar punimesh për vete dhe të afërmit. Që nga viti 2019 fillova ta ushtorj ai profesion ku me mbështetjen e familjes kam hapur një punishte me produkte të punuara 100 % në dru.
Çfare punimesh druri realizoni?
Fokusi është që çdo punë ta realizojmë në dru 100 % dhe pothujse çdo mobilje mund të realizohet në dru. Më së shumti ato që kërkohen janë, tavolina ngrënie, tavolina mesi, mobilie televizori, biblioteka, raft ndarës ambientesh, kredenca, pasqyra, ora, skulptura etj.
Cilat janë teknikat që përdorni për të finalizuar një dekor druri?
Normalisht druri është një ndër materialet më të vjetra që njeh njerëzimi në shërbim të vetes, merret i papërpunuar edhe si rrjedhojë kërkon shumë punë. Ne përdorim një ndër teknikat më të vjetra, atë të punimit me dorë të drurit, gjë që na mundëson të jemi më afër edhe nxjerrim më të bukurën nga çdo produkt që realizojmë. Punimin artizanal përdorim më shumë, por gjithashtu me avancimin e teknologjisë jemi mbështetur dhe në përdorimin e pajisjeve të ndryshme të përpunimit .
Sa e vështirë ka qenë të mbijetoni në treg?
Patjetër që kam patur vështiresi gjatë këtyre 4 viteve që unë operoj në treg si biznes i ri. Sigurimi i bazës materiale kryesore siç është druri dekorativ ka qenë edhe do të mbetet një ndër vështirësitë kryesore për ne, pasi materialet drusore dekorative të cilat në përdorim janë të rralla. Vështirësia tjetër vjen edhe për shkak te çmimeve me të larta të produkteve të drurit krahasuar me produkte imituese të tij. Mungesës së informacionit që kanë blerësit mbi koston edhe artin e të punuarit me dru, e bën akoma edhe me të vështirë depërtimin në treg të këtyre produkteve dhe si rrjedhojë vihet re një mungesë e klientit potencial.
Cilat biznese preferojnë më shumë punimet e drurit?
Duke u nisur nga vetitë që vet druri ka, të qënurit shumë miqësor me mjedisin, ekologjik, rezistent ndaj ujit dhe pa harruar të përmend bukurinë e ngjyrave natyrale të tij, është i ngrohtë në çdo ambient ku njerëzit jetojnë dhe ushtrojnë aktivitetet e tyre. Mund të përmendim këtu arredimet e shtëpive, restorantet, baret, hotelet zyrat etj.
Instagram: Artnedru
