Monedhat kryesore ndërkombëtare kanë pasur një tendencë në rritje të lehtë në raport me lekun, gjatë muajit janar, duke tentuar një rimëkëmbje pas humbjeve të realizuara gjatë vitit 2023. Sipas të dhënave të Bankës së Shqipërisë, monedha europiane, euro, e nisi vitin 2024 në nivelin mesatar të 103.24 lekëve dhe e mbylli 103.9 lekë, duke u rritur lehtë me 0.37%. Sikurse mund ta shohim edhe nga grafiku, nivelin maksimal euro e regjistroi në sesionin e tretë të vitit, ekzaktësisht në 5 janar, duke regjistruar nivelin e 104.71 lekëve. Nga ky moment e deri në 16 janar, monedha europiane ka pasur një tendencë në rënie, drejt 103.7 lekëve, ndërsa në vijim ndryshimet kanë qenë minimale.
Ndërkohë, edhe dollari amerikan ka publikuar fitime gjatë janarit, në raport me monedhën tonë. Sërish sipas të dhënave të Bankës së Shqipërisë, sesionin e parë të vitit 2024, monedha e gjelbër e ka nisur në 94.4 lekë dhe e ka mbyllur janarin në 95.95 lekë, në rritje me 1.55 lekë ose me rreth 1.5%. Nivelin më të lartë mujor, dollari e ka regjistruar më 29 janar, pranë 96 lekëve mesatarisht. Sikurse mund ta shohim edhe nga grafiku, dollari ka pasur një ecuri të ndryshme nga euro, për shkak të forcimit të tij në tregjet ndërkombëtare, si pasojë e shtyrjes së pritshmërive për uljen e interesave nga Rezerva Federale në muajin mars. Ndryshe nga monedha europiane, ecuria e së cilës përcaktohet nga kërkesa dhe oferta në tregun shqiptar, ecuria e dollarit në raport me lekun përcaktohet nga raporti i dollarit dhe euros në tregjet ndërkombëtare.
Në këtë mënyrë ndryshe nga 2023-shi, ky vit duket se ka nisur me një tendencë në rritje për monedhat kryesore ndërkombëtare. Viti i kaluar, rezultoi me një mbiçmim të ndjeshëm në monedhës sonë kombëtare, krahasuar me vitin paraardhës. Euro e mbylli vitin 2023, në rënie me mbi 9%, ndërsa dollari humbi mbi 12% të vlerës në raport me lekun. Ndihmuar edhe nga një sezon turistik tepër i mbarë, në mesin e muajit korrik euro ra deri në 100,49 lekë, që ishte edhe pika më e ulët për monedhën e përbashkët europiane.
Dhe për të parandaluar që luhatjet në kursin e këmbimit të krijojnë komplikacione të tjera në ekonomi, qeveria ka parashikuar disa masa mbrojtëse në terma afatmesëm. Për periudhën 2025-2027, qeveria shqiptare parashikon krijimin e një fondi kontingjence për t’u mbrojtur nga luhatjet e forta të lekut në raport me valutat kryesore dhe nga normat e interesit. Në çdo vit buxhetor të planifikuar duhet të përfshihet një kontingjencë e veçantë, prej jo më pak se 0.7 për qind e shpenzimeve totale të buxhetit, për të kompensuar rreziqe potenciale, me ndikim edhe në nivelin e borxhit.
Marrë nga Scan Tv
