Raftet e marketeve në Shqipëri janë të mbushura me ushqime të përpunuara nga importi.
Por zhvillimet pozitive në turizëm, që po rrisin interesin për prodhim vendas, dhe nga ana tjetër kërkesa për prodhime organike po nxit përfshirjen e frutave të pyllit në zinxhirin e përpunimit.
Gështenjat, boronicat e Tropojës tani po bëhen gliko dhe reçel nga biznesmeni Ardian Çitozi, i cili është në të njëjtën kohë është një nga eksportuesit më të mëdhenj të gështenjës dhe frutave që rriten në gjendje të egër.
Nisur nga përvojat e vendeve të tjera, por edhe për të rritur të ardhurat, ai ka nisur prodhimin e së paku 18 lloje glikosh dhe reçelrash që kanë si bazë frutat e egra të pyllit. Prodhimi do të certifikohet si organik, pasi do të sigurohet edhe sheqeri si i tillë. Vlera e një kilogrami gështenjë të freskët së paku 10-fishohet kur ajo bëhet gliko. Po kështu rritet edhe vlera e boronicës, mjedrës, fikut të egër etj.
Shqipëria e ka shumë pak të zhvilluar zinxhirin e përpunimit të ushqimeve në vend, teksa për shkak të natyrës ka një shumëllojshmëri prodhimesh totalisht organike. Por bizneset e sektorit pohojnë se, duhet ende shumë punë për të nxitur konsumatorët shqiptarë të zgjedhin prodhimet shqiptare në raftet e supermarketëve.
Aktualisht në të gjitha pikat e pakicës gjen një shumëllojshmëri reçelrash të importuar, ndërkohë që Shqipëria është një nga vendet e pakta në Europë që mundëson fruta që rriten në gjendje të egër pa praninë e ndotjes dhe pesticideve. Mirëpo për shkak të mungesës së mbështetjes financiare dhe ngarkesës së lartë fiskale frutat që përpunohen në vend kanë kosto më të lartë se importi.
Psh hotelet në të gjithë vendin janë konsumatorë të mëdhenj të reçelit, i cili në një masë të madhe importohet nga Kina me çmim shumë të lirë në një kohë që mollët e Korçës kalben. Përpunuesit pohojnë se mungojnë incentivat vendase që të lidhin bujqësinë me sektorin e turizmit. Në mungesë të mbështetjes financiare mjafton edhe sensibilizimi ndaj hoteleve dhe restoranteve që të furnizohen me prodhime vendi.
Skema e TVSH gjithashtu i pengon përpunuesit dhe shitësit e pakicës që të tregtojnë prodhimi vendi. Një dyqan në Tiranë që shet vetëm prodhime organike nga vendi është i rrezikuar në çdo moment pasi nuk ka të shkarkojë TVSH duke qenë se klientët e tij janë prodhues të vegjël dhe shesin pa fatura. Zotëruesi i njësisë prodhimeve organike tha se kërkesa për produkte vendi ka rritje me 30 % në vit, por zgjerimi i aktivitetit në shumë pika të tjera është i pamundur për shkak të problemeve më informalitetin.
Zoti Çitozi thotë se mbështetja e prodhimeve organike dhe sidomos përpunimi i frutave të pyllit rrit direkt të ardhurat në zonat më të varfra të vendit dhe pengon shpopullimin e tyre.
Marrë nga Monitor
