Administrata Tatimore ka nisur procesin e rimbursimit për mijëra qytetarë që kanë deklaruar fëmijët në ngarkim përmes Deklaratës Individuale Vjetore të të Ardhurave, DIVA 2025. Sipas të dhënave zyrtare, 34,263 individë kanë rezultuar me tatim të mbipaguar dhe do të përfitojnë kthim të shumave në llogaritë bankare të deklaruara prej tyre.
Përfitues të kësaj skeme janë individët e punësuar që kanë deklaruar një ose dy fëmijë në ngarkim dhe kanë aplikuar për rimbursim nëpërmjet sistemit elektronik e-filing.
Ekspertët sqarojnë se të punësuarit me të ardhura mbi 1.2 milionë lekë në vit mund të përfitojnë zbritje tatimore për fëmijët në ngarkim, ku kompensimi arrin deri në rreth 6200 lekë për çdo fëmijë.
Ndërkohë, edhe qytetarët me të ardhura nën pragun 1.2 milionë lekë në vit, megjithëse nuk e kanë detyrim ligjor plotësimin e DIVA-s, mund të përfitojnë nëse e kanë dorëzuar deklaratën në mënyrë vullnetare. Përveç zbritjes për fëmijët në ngarkim, ata kanë të drejtë të përfitojnë edhe nga zbritja tatimore për shpenzimet arsimore.
Për njohjen e këtyre shpenzimeve kërkohet faturë e fiskalizuar, e cila konsiderohet dokumenti ligjor bazë. Gjithashtu, si dokumente mbështetëse mund të paraqiten kontratat me institucionet arsimore përkatëse.
Sipas skemës aktuale, individët mund të përfitojnë zbritje nga baza tatimore deri në 100 mijë lekë, çka përkthehet në një kthim maksimal deri në 13 mijë lekë në vit për shpenzimet arsimore.
Të dhënat më të fundit të Ministrisë së Financave tregojnë se deri në fund të muajit prill janë dorëzuar gjithsej 164,263 deklarata, ose 25% më shumë krahasuar me një vit më parë. Nga kjo skemë kanë përfituar 77,077 individë për fëmijët nën 18 vjeç.
Në total, sistemi ka gjeneruar rreth 1.4 miliard lekë për rimbursime ndaj individëve me tepricë kreditore, ndërsa deri në fund të muajit të kaluar janë kërkuar për t’u tërhequr rreth 670.2 milionë lekë.
Kjo është hera e parë që një mekanizëm i tillë lehtësues fiskal aplikohet përmes deklarimit të DIVA 2025, duke krijuar më shumë mundësi për qytetarët që deklarojnë të ardhurat në mënyrë korrekte dhe duke synuar një administratë tatimore më efikase dhe më pranë qytetarëve.
