Tregu i Airbnb në Shqipëri po zgjerohet me shpejtësi, me një rritje prej 54.5% të listimeve dhe të ardhura mesatare vjetore rreth 1.17 milionë lekë për pronë. Tirana kryeson për numrin e akomodimeve, ndërsa Riviera shqiptare dhe Saranda renditen ndër zonat më fitimprurëse falë çmimeve më të larta ditore dhe kërkesës turistike.
Tregu i qirave afatshkurtra në Shqipëri po shënon një zgjerim të ndjeshëm, ndërsa platformat si Airbnb po kthehen në një alternativë gjithnjë e më të përdorur nga pronarët e apartamenteve dhe investitorët. Rritja e numrit të turistëve, sidomos gjatë viteve të fundit, ka ndikuar drejtpërdrejt në kërkesën për akomodime private, duke sjellë shtim të numrit të pronave të hedhura në treg.
Ndërkohë, të ardhurat nga ky sektor kanë shënuar një rritje prej 10.14%, duke treguar se pavarësisht shtimit të konkurrencës, kërkesa për akomodime afatshkurtra vijon të mbetet e fortë.
Tirana mbetet tregu më i madh për Airbnb
Kryeqyteti shqiptar vazhdon të jetë tregu më i zhvilluar për qiratë afatshkurtra për sa i përket numrit të pronave. Tirana renditet e para me rreth 3,650 listime aktive, duke reflektuar kërkesën e lartë nga turistët, vizitorët e biznesit dhe udhëtarët që zgjedhin kryeqytetin si pikë nisjeje për eksplorimin e vendit.
Tirana ka një normë mesatare zënieje prej 62%, ndërsa çmimi mesatar ditor i një akomodimi është rreth 4,500 lekë. Të ardhurat mesatare vjetore për një pronë në kryeqytet arrijnë më shumë se 1 milionë lekë.
Bregdeti sjell fitimet më të larta
Edhe pse Tirana kryeson për numrin e ofertave, zonat turistike bregdetare shfaqen si ndër tregjet më fitimprurëse. Saranda, një nga destinacionet më të kërkuara verore, renditet e dyta me 2,657 listime.
Qyteti jugor ka një tarifë mesatare ditore më të lartë prej 6,414 lekësh, ndërsa të ardhurat mesatare vjetore për një pronë arrijnë në 1.3 milionë lekë. Kjo lidhet me sezonin e fortë turistik dhe kërkesën e lartë për akomodime pranë detit.
Një performancë të spikatur ka edhe Riviera shqiptare, e cila ndonëse ka një numër më të kufizuar pronash në treg, me rreth 605 listime, rezulton zona me të ardhurat më të larta mesatare. Një pronë në këtë zonë gjeneron rreth 1.5 milionë lekë në vit, ndërsa çmimi mesatar ditor është 6,879 lekë dhe norma e zënies arrin në 61%.
Vlora dhe Durrësi vijojnë të jenë pika të rëndësishme turistike
Në renditje vijon Vlora, me rreth 1,692 listime, normë zënieje prej 50% dhe të ardhura mesatare vjetore me më shumë se 1 milionë lekësh për pronë. Qyteti po fiton gjithnjë e më shumë rëndësi falë kombinimit të turizmit bregdetar dhe lidhjeve më të mira infrastrukturore.
Ndërsa Durrësi, një nga zonat më të afërta me kryeqytetin dhe një destinacion tradicional turistik, ka rreth 1,669 listime aktive. Norma mesatare e zënies është 52%, tarifa ditore rreth 5,112 lekë, ndërsa të ardhurat mesatare vjetore për një pronë janë rreth 983 mijë lekë.
Të dhënat tregojnë se tregu i Airbnb në Shqipëri po kalon një fazë zgjerimi të shpejtë. Rritja e turizmit po krijon mundësi të reja për pronarët, ndërsa qytetet dhe zonat bregdetare po konkurrojnë për të tërhequr gjithnjë e më shumë vizitorë./Scan
