Bashkimi Evropian po zbaton një masë të re sigurie rrugore që pritet të ndikojë drejtpërdrejt në mënyrën se si do të projektohen dhe pajisen automjetet e reja.
Duke filluar nga 7 korriku, të gjitha veturat e reja që dalin në tregun evropian do të duhet të jenë teknikisht të përgatitura për instalimin e sistemit të njohur si “Alcolock”, një teknologji që synon të parandalojë drejtimin e automjetit nën ndikimin e alkoolit.
“Alcolock” funksionon si një alkotest i integruar në automjet. Para ndezjes së motorit, shoferi duhet të kryejë një test frymëmarrjeje. Nëse pajisja zbulon një nivel alkooli mbi kufirin e lejuar, automjeti nuk do të mund të ndizet.
Megjithatë, rregullorja e re nuk kërkon që çdo makinë e re të pajiset menjëherë me këtë sistem. Prodhuesit do të jenë të detyruar vetëm të sigurojnë që automjetet të kenë infrastrukturën teknike të nevojshme për instalimin e tij në një fazë të mëvonshme.
Sistemi pritet të përdoret kryesisht në rastet kur autoritetet ose gjykatat vendosin masa ndaj shoferëve që kanë kryer shkelje të rënda ose të përsëritura të rregullave të trafikut, veçanërisht ato që lidhen me drejtimin e automjetit nën ndikimin e alkoolit.
Kjo masë është pjesë e paketës së re evropiane për sigurinë rrugore, e njohur si GSR2 (General Safety Regulation), e cila synon të reduktojë ndjeshëm numrin e aksidenteve dhe viktimave në rrugët e Bashkimit Evropian.
Ekspertët e sigurisë rrugore vlerësojnë se përdorimi më i gjerë i sistemit “Alcolock” mund të ulë deri në 65 për qind numrin e aksidenteve fatale të lidhura me konsumimin e alkoolit.
Përveç këtij sistemi, rregullat e reja parashikojnë edhe një sërë teknologjish të tjera të detyrueshme në automjetet moderne, përfshirë sistemet e avancuara për zbulimin e këmbësorëve dhe çiklistëve, monitorimin e gjendjes dhe sjelljes së shoferit, si dhe funksione të zgjeruara të regjistrimit të të dhënave të automjetit, të njohura si “kutia e zezë”.
Edhe pse shumica e drejtuesve të mjeteve nuk do ta përdorin drejtpërdrejt këtë pajisje, nga 7 korriku çdo automjet i ri në tregun e Bashkimit Evropian do të duhet të jetë i gatshëm për instalimin e saj, në kuadër të përpjekjeve për rritjen e sigurisë në rrugë.
