Instagram ka vendosur të ndryshojë pamjen e logos së tij pas rreth një dekade, duke sjellë një version të ri vetëm me tekst. Ridizajnimi është prezantuar si një ndryshim i vogël, por ka mjaftuar për të ndezur menjëherë diskutimet mes përdoruesve në rrjetet sociale.
Drejtori i Instagramit, Adam Mosseri, e ka prezantuar logon e re duke e përshkruar si më moderne, më të pastër dhe më të mprehtë, ndërsa ideja ka qenë që të ruhet identiteti karakteristik i platformës. Ndryshimi prek kryesisht formën e shkronjave, me kthesa më të theksuara që bien veçanërisht në sy te “s”, “r” dhe “g”.
Por, siç ndodh shpesh me ndryshimet e logove të markave të mëdha, reagimet nuk kanë qenë të gjitha pozitive. Disa përdorues e kanë pëlqyer pamjen e re dhe e konsiderojnë më elegante e moderne, ndërsa të tjerë kanë pyetur se pse ishte e nevojshme të ndryshohej një logo që tashmë ishte bërë aq e dallueshme.
Madje, një detaj i veçantë është kthyer në objekt humori në rrjet. Forma e re e shkronjës “r” ka bërë që disa përdorues të thonë me shaka se emri tashmë duket sikur shkruan “Instagzam”.
Ky është ndryshimi i parë i madh i wordmark-ut të Instagramit që nga viti 2016, kur platforma bëri një transformim të rëndësishëm të identitetit të saj vizual. Këtë herë, ikona shumëngjyrëshe e kamerës nuk është zëvendësuar, ndaj për momentin bëhet fjalë kryesisht për ndryshimin e logos tekstuale.
Nëse logoja e re do të shoqërohet edhe me ndryshime të tjera në pamjen e aplikacionit, mbetet për t’u parë. Ndërkohë, Instagram duket se ka arritur atë që ndoshta çdo ridizajnim kërkon: të bëjë njerëzit të flasin për të.
