Qeveria e Kosovës e ka miratuar të martën projektligjin për buxhetin e vitit 2024 në vlerë prej 3.3 miliardë euro, një rritje e vogël krahasuar me buxhetin e vitit të kaluar. Projektligji për buxhetin do të dërgohet në Kuvendin e Kosovës për shqyrtim dhe miratim.
Qeveria ka miratuar projektbuxhetin për vitin 2024, i cili do të jetë për 100 milionë euro më i lartë se i sivjetmi.
Nëse dokumenti kalon në Kuvend, buxheti i vitit të ardhshëm do të jetë 3.3 miliardë euro.
Në prezantimin e Projektligjit për ndarjet buxhetore për vitin e ardhshëm, kryeministri Albin Kurti tha se kujdes u është kushtuar sigurisë dhe mbrojtjes.
Sipas kryeministrit Kurti, në vitin 2024 do të rrisin numrin e policëve edhe për 500 të tjerë, derisa atë të ushtarëve edhe për 600.
“Buxheti për Ministrinë e Punëve të Brendshme për herë të parë do të tejkalojë 216 milionë euro, dhe për Ministrinë e Mbrojtjes do të jetë mbi 153 milionë euro, apo rreth 370 milionë euro për sektorin, e që i bie rreth 22 për qind më shumë sesa viti 2023 në të cilin ndodhemi aktualisht”.
Ai ka prezantuar buxhetin e paraparë për disa prej dikastereve ministrore. Ka veçuar atë për arsimin, që sipas tij do të arrijë në 370 milionë euro apo rreth 20 për qind më shumë sesa këtë vit.
“Arsimi do të ketë mbështetjen e nevojshme, për ndërtimin e çerdheve, zbatimin e reformave, dhe mbështetjen e të rejave e të rinjve me bursa”.
Kurti ka bërë të ditur se Qeveria do të vazhdojë me investimet në renovimin e spitaleve e blerjen e pajisje në mënyrë që qytetarët “të mos kenë nevojë të udhëtojnë jashtë vendit për të kërkuar shërim”.
“Për vitin 2024, SHSKUK-së i është shtuar buxheti për 25 për qind, kurse për shëndetësinë si sektor në tërësi kemi ndarë mbi 340 milionë euro, përfshirë edhe grantin për komunat”.
Sipas prezantimit të Kurtit, buxheti për Ministrinë e Drejtësisë është rritur për 31 për qind, kurse për Ministrinë e Kulturës, Rinisë e Sportit, janë ndarë mbi 58 milionë euro për investime kapitale.
Mbështetje do të kenë edhe investimet e reja kapitale në infrastrukturën rrugore, hekurudhore, në diga e rrjete të ujësjellësit, si dhe në kapacitetet e reja energjetike.
“Për këtë kemi paraparë një buxhet prej 860 milionë euro për investime kapitale”.
Sipas tij, nga buxheti total, 742 milionë euro janë për komunat. Prej tyre 635 milionë janë grant që u jepet komunave e 107 milionë euro të tjera të hyra vetanake të tyre.
Ndërkaq, ministri i Financave, Hekuran Murati, ka thënë se me buxhetin e vitit të ardhshëm synohet vazhdimi i reformave që kanë nisur.
“Ky propozim buxhet ofron më të mirën për qytetarët dhe ekonominë tonë dhe nëpërmes këtij buxheti synohet vazhdimësia e reformave strukturore të nisura gjatë mandatit tonë si qeveri, të cilat do të gjenerojnë rritje të qëndrueshme ekonomike, rritje të mirëqenies së qytetarëve, rritje të punësimit, por gjithmonë duke siguruar edhe qëndrueshmërinë e financave publike në periudhën afatmesme dhe afatgjate”.
Murati tha se gjatë vitit të ardhshëm pritet të ketë rritje të eksportit të mallrave, e që sipas ministrit, do të bëhet përmes mbështetjes së prodhuesve vendorë me masat fiskale që do të ndërmarrin.
E, në një konferencë për media, ministri Murati tha se do të mbajnë premtimin e dhënë që koeficienti i pagave për vitin 2024 të jetë 110 euro. Me këtë rritje, sipas ministrit, paga mesatare në sektorin publik do të jetë 780 euro.
Për rritjen e pagave në sektorin publik paraprakisht ka folur edhe kryeministri Kurti.
“Të gjitha përllogaritjet e buxhetit te kategoria e pagave janë duke e marrë për bazë edhe rritjen e koeficientit. Dhe, gjithsej buxheti për paga parashihet që të jetë 805 milionë euro, apo rreth 30 për qind më lartë sesa buxheti para 5 vjetëve”.
Kurti në mbledhjen e Qeverisë tha se për sektorin publik, koeficienti i pagave për vitin 2024 do të jetë 110 euro.
E me rritjen e koeficientit tashmë siç është e rregulluar me ligj, rriten edhe pagat në sektorin publik. Rritjen më të madhe të pagave, do ta kenë ata që e kanë koeficient më të lartë.
Në bazë të ligjit në Kosovë koeficientin më të madh e ka Presidentja e Kosovës (18).
Paga e Presidentes me rritjen e koeficientit të pagave nga 1890 euro sa e ka aktualisht, shkon në 1,980 (90 euro rritje).
Paga e kryetarit të Gjykatës Kushtetuese nga 1837 euro, shkon në 1925 euro (88 euro rritje).
Paga e kryeministrit, kryetarit të Kuvendit, kryetarit të Gjykatës Supreme, Kryeprokurorit të Shtetit rritet për 85 euro (nga 1,785 euro shkon në 1,870 euro).
Paga e deputetëve dhe ministrave rritet për 82 euro (nga 1,722 euro shkon në 1,804 euro).
Paga e kryetarit të Prishtinës dhe komandantit të FSK-së rritet për 75 euro (nga 1,575 euro shkon në 1,650 euro).
Paga e ushtarit të FSK-së rritet për 28 euro (nga 588 euro shkon në 616 euro).
Paga e gardianit të burgut rritet për 27.5 euro (nga 577.5 euro shkon në 605 euro).
Paga e policit dhe zjarrfikësit rritet për 25 euro ( nga 525 euro shkon në 550 euro).
Paga e rektorit të UP-së rritet për 71 euro (nga 1491 shkon në 1562 euro).
Paga e profesorit universitar rritet për 62 euro (nga 1302 euro shkon në 1364 euro).
Paga e mësimdhënësit të shkollës së mesme të lartë rritet për 29 euro (nga 609 euro shkon në 638 euro).
Paga e mësimdhënësit të shkollës së mesme të ulët rritet për 28 euro (nga 588 euro shkon në 616 euro).
Paga e edukatorit rritet për 26 euro (nga 546 euro shkon në 572 euro).
Paga e mjekut specialist rritet për 60 euro (nga 1,260 euro shkon në 1,320 euro). Paga e infermierit rritet prej 25 deri 30 euro.
Burimi : Monitor.al
