Vendi ynë vazhdon të tërheqë vëmendjen e mediave të huaja. Kësaj radhe media amerikane HuffPost e ka renditur mes 27 vendeve trend për vitin e ardhshëm. “Evropa do të vazhdojë të jetë një pikë e nxehtë në vitin 2024, veçanërisht Italia dhe Irlanda. Megjithatë, më shumë udhëtarë shpresojnë të shpëtojnë nga turmat duke vizituar vende si Shqipëria dhe Maqedonia e Veriut”, shkruhet në median e njohur.
Në të vërtetë, Shqipëria nuk është në radarin e të gjithëve, të paktën jo ende. Kjo është arsyeja pse një vend si Tirana mund të jetë një destinacion ideal për ata që kërkojnë diçka ndryshe.
“Shumica e njerëzve ende nuk e kanë zbuluar atë, por fluturimet dhe infrastruktura turistike janë në vend, dhe ka më pak turma në krahasim me destinacionet në trend evropian si Italia, Greqia apo Portugalia,” tha Laura Lindsay, eksperte e udhëtimeve. Plazhet e bukura të Rivierës Shqiptare dhe kostoja më e lirë e jetesës e bëjnë atë një destinacion të shkëlqyeshëm për verën. Shqipëria ka qytete historike për t’u eksploruar dhe një skenë festivalesh në zhvillim, me ngjarje që zënë vendin e tyre në të gjithë kalendarin muzikor botëror.
