Vlera e pasurisë së njerëzve më të pasur në vitin 2022 përjetoi rënien më të madhe në dhjetë vjet për shkak të rënies së tregjeve të aksioneve, sipas një sondazhi ndërkombëtar të kryer nga ‘Capgemini’.
Në nivel global, numri i njerëzve të pasur – njerëz me më shumë se 1 milion dollarë para në dorë, sipas kritereve të ‘Capgemini’ – ra me 3.3% në 2022, në 21.7 milion.
Në të njëjtën kohë, ka rënë edhe vlera e pasurisë së tyre totale, e cila në vitin 2022 vlerësohej në 83 trilionë dollarë, me një rënie prej 3.6% krahasuar me një vit më parë.
Kjo është rënia më e madhe në dhjetë vjet për shkak të pasigurive makroekonomike dhe gjeopolitike, sipas sqarimeve të ‘Capgemini’ në raportin vjetor që mbulon 71 vende.
Shpërthimi i luftës në Ukrainë dhe pasojat e saj në planet, si dhe rritja e inflacionit dhe e normave të interesit të bankës qendrore, e bënë vitin 2022 shumë të vështirë nga pikëpamja ekonomike. Krahas kësaj, vitin e kaluar u ulën edhe indekset e bursave botërore. Sipas ekspertëve ekziston një marrëdhënie e fortë midis evolucionit të indekseve të tregut të aksioneve dhe aktiveve.
Disa nga njerëzit më të pasur në botë e panë pasurinë e tyre të rritet me një ritëm më të ngadaltë vitin e kaluar, duke përfshirë njeriun më të pasur në botë, pronarin e LVMH Bernard Arnault dhe themeluesin e Facebook, Mark Zuckerberg.
Amerika e Veriut pa rënien më të madhe në vlerën e aseteve të të pasurve – 7.4%, e ndjekur nga Europa – 3.2%) dhe rajoni Azi-Paqësor – 2.7%.
Në të kundërt, të pasurit në Afrikë, Lindjen e Mesme dhe Amerikën Latine kanë parë pasurinë e tyre të rritet falë rritjes së çmimeve të naftës dhe gazit.
Burimi : Scan Tv
