Buxheti i shtetit po mbledh më shumë të ardhura nga taksa e cila lidhet drejtpërsëdrejti me nivelin e konsumit nga ana e qytetarëve shqiptarë, për produkte të shportës, por jo vetëm.
Të dhënat zyrtare të Ministrisë së Financave tregojnë se të ardhurat bruto nga Tatimi mbi Vlerën e Shtuar në 7-mujor janë regjistruar në nivelin 137 miliardë lekëve, me një rritje prej 17 miliardë lekësh në raport me një vit më parë. Dhe pavarësisht se rimbursimet e dhëna nga buxheti për TVSH-në janë rritur me 4 miliardë lekë gjatë kësaj periudhe, sërish të ardhurat neto rezultojnë 12.8 miliardë lekë, apo rreth 128 milionë euro më të larta se e njëjta periudhë e një viti më parë.
Peshën më të madhe e zë TVSH-ja e mbledhur në import nga administrata doganore, ku në 7 muaj janë arkëtuar 89.5 miliardë lekë, duke shënuar rritje me 7.9% në raport me një vit më parë pavarësisht kursit të këmbimit i cili vijon të jetë në favor të lekut, çka tregon kërkesën në rritje të qytetarëve për produkte ushqimore dhe jo ushqimore.
Megjithatë rritjen më të madhe në përqindje e kanë të ardhurat nga TVSH së arkëtuar (neto) brenda vendit, administruar tatimet, të cilat u realizuan në masën 32.7 miliardë lek, me një kapërcim prej 6.3 miliardë lek ose 23.7% më shumë se 7-mujori 2023
Ajo që vihet nga të dhënat e përpunuara nga SCAN TV, është që nëse marrim në analizë të njëjtën periudhë në 5 vitet e fundit, rritja është progresive dhe 2024 -ta shënon rekord në të hyrat nga TVSH dhe thuajse regjistrohet një dyfishim në raport me vitin 2020, kur TVSH-ja neto e arkëtuar regjistrohej në 69.8 miliardë lekë.
Ndër faktorët që kanë ndikuar në këtë perfomancë është rritja e numrit të turistëve në vendin tonë, normalizmi i çmimeve gjatë këtij viti, gjë që i ka shtyrë qytetarët të rrisin kërkesën dhe konsumin. Nga ana tjetër ndikim kryesor ka pasur edhe reforma e rritjes së pagave në administratë, gjë që i ka dhënë më shumë mundësi qytetarëve për të shpenzuar. Kjo reformë ka vënë në lëvizje edhe sektorin privat./Scan
