Në ditët e sotme është kthyer ndër platformat më të kërkuara. Bëhet fjalë për Bliss.al e cila ofron terapi online në gjuhën shqipe nga staf psikologësh të kualifikuar. Në një intervistë për Probizz.al, themeluesja e Platformës Bliss.al Jona Doda tregon se si start-upi u ngrit si nevojë për të marrë ndihmë profesionale në gjuhën shqipe edhe për Diasporën.
Si ju lindi ideja për këtë platformë?
Ideja për Bliss.al lindi nga përvoja ime personale. Kam jetuar jashtë Shqipërisë për shumë vite dhe e kam përjetuar vetë sa e vështirë është të gjesh një psikolog që flet shqip dhe kupton kontekstin kulturor. Gjatë një sondazhi që zhvilluam me shqiptarë në diasporë, mbi 93% e pjesëmarrësve ndanë të njëjtin shqetësim: mungesën e aksesit në ndihmë profesionale në gjuhën e tyre. Kjo ishte nxitja për të krijuar Bliss, platformën e parë për terapi online për diasporën shqiptare, që lidh njerëzit me psikologë të kualifikuar përmes seancave me video, audio apo chat, kudo që ndodhen.
Çfarë stafi ka? Çfarë kualifikimesh kanë?
Të gjithë psikologët në Bliss janë të licencuar dhe të certifikuar në Shqipëri ose jashtë vendit. Ata kanë eksperienca të ndryshme klinike dhe përdorin qasje të ndryshme terapeutike, si CBT, terapi psikodinamike, terapi familjare apo qasje integruese. Përveç stafit klinik, kemi edhe një ekip teknologjie dhe marketingu që kujdeset për funksionimin dhe përmirësimin e platformës. Procesi i përzgjedhjes së psikologëve është i kujdesshëm dhe përfshin verifikimin e diplomave, licencës dhe intervista të detajuara.
A mendoni se terapia online ka ardhur si sfidë, apo si një formë që u përshtatet më mirë nevojave të sotme të njerëzve?
Terapia online fillimisht u pa si zgjidhje në kohë të vështira, sidomos gjatë COVID, por sot është kthyer në një zgjedhje të vetëdijshme për shumë njerëz. Shumë prej klientëve tanë ndihen më të lirë dhe më të sigurt duke folur nga një ambient i njohur, pa u ekspozuar. Për shqiptarët që jetojnë jashtë, terapia online është shpesh alternativa e vetme për të folur me një profesionist në gjuhën shqipe. Koha, fleksibiliteti dhe privatësia janë ndër arsyet kryesore që njerëzit zgjedhin Bliss.
Në këtë periudhë kohore sa ka funksionuar platforma Bliss, çfarë i shqetëson më së shumti shqiptarët?
Në bazë të dhënave të agreguara që kemi mbledhur në platformë, shqetësimet më të shpeshta lidhen me ankthin, stresin e migrimit, ndarjen nga familja, vështirësitë në marrëdhënie dhe mungesën e vetëbesimit. Për shqiptarët jashtë vendit, ndjenja e vetmisë dhe e shkëputjes kulturore është një temë shumë e pranishme. Për të rinjtë, shpesh lind nevoja për të folur me dikë për presionin social dhe pritshmëritë e larta nga familja apo miqtë. Bliss është bërë një hapësirë ku ata ndihen të dëgjuar dhe të mirëkuptuar.
E fundit por jo më pak e rëndësishme, çfarë kosto ka për një pacient një terapi online dhe si funksionon pagesa?
Çmimi i një seance fillon nga 30 euro dhe ndryshon në varësi të eksperiencës së psikologut. Platforma ofron mundësinë e pagesës me kartë direkt përmes faqes sonë, në mënyrë të sigurt dhe të lehtë. Nuk ka abonime apo detyrime afatgjata. Çdo përdorues zgjedh vetë psikologun/en dhe rezervon seancën që i përshtatet. Gjithashtu, Bliss ofron një shërbim falas për përputhjen me psikologun më të përshtatshëm sipas nevojave të çdo personi.
