Një raport i ri mbi kostot e udhëtimeve në Evropë ka zbuluar qytetet që ofrojnë pushimet më të lira dhe më të shtrenjta për vitin 2026, ndërsa Tirana renditet ndër destinacionet më ekonomike për turistët europianë.
Sipas Barometrit të fundit të Kostove të Qytetit nga Post Office Travel Money në Mbretërinë e Bashkuar, kryeqyteti shqiptar zë vendin e tretë në listën e qyteteve më të lira për një pushim të shkurtër në Evropë, pas Sarajevës dhe Bukureshtit.
Raporti analizoi kostot e 12 shpenzimeve tipike turistike për dy persona në 50 qytete evropiane, duke përfshirë akomodimin në hotel me tre yje për dy netë, ushqimin dhe pijet, transportin publik, biletat për muze dhe atraksione turistike, si edhe aeroporti.
Në një kohë kur çmimet e fluturimeve janë rritur ndjeshëm, pushimet e shkurtra në qytete evropiane po konsiderohen si alternativa më ekonomike dhe më praktike për turistët gjatë verës së vitit 2026.
Tirana, ndër destinacionet më të favorshme në Evropë
Raporti e përshkruan Tiranën si një destinacion në rritje për turistët ndërkombëtarë, duke theksuar se kryeqyteti shqiptar ofron gjithçka që nevojitet për një pushim të qetë në qytet me kosto të ulëta për akomodimin, ushqimin dhe transportin.
Kostoja totale për 12 artikujt e përfshirë në analizë e vendos Tiranën në mesin e qyteteve më të përballueshme në kontinent, duke e bërë atë një zgjedhje tërheqëse për turistët që kërkojnë eksperienca kulturore dhe jetë urbane pa shpenzime të larta.
Në katërshen e qyteteve më të lira për vitin 2026 renditen:
- Sarajeva
- Bukureshti
- Tirana
- Beogradi
Sipas raportit, Evropa Lindore dominon edhe këtë vit listën e destinacioneve me vlerën më të mirë për paratë e turistëve, me tetë nga dhjetë qytetet kryesore që ndodhen në këtë rajon.
Oslo, qyteti më i shtrenjtë për pushime në 2026
Në anën tjetër të renditjes, Oslo rezulton qyteti më i shtrenjtë në Evropë për një pushim të shkurtër, me një kosto totale prej rreth 850 euro për dy persona.
Pas tij renditen:
- Kopenhageni
- Edinburgh-u
- Gjeneva
- Barcelona
Raporti thekson se çmimet e larta të akomodimit dhe kostot e mëdha të restoranteve janë faktorët kryesorë që ndikojnë në rritjen e shpenzimeve për turistët në këto destinacione.
“Në qytetet më të lira, turistët kanë më shumë liri për të shijuar eksperiencën pa u shqetësuar vazhdimisht për buxhetin. Ndërsa në qytetet më të shtrenjta, planifikimi paraprak bëhet thelbësor për të kontrolluar kostot”, thuhet në raport.
Me rritjen e interesit për udhëtime ekonomike dhe destinacione alternative, Tirana po fiton gjithnjë e më shumë vëmendje si një nga qytetet më të favorshme për pushime në Evropë gjatë vitit 2026.
Përkthyer dhe përshtatur nga Euronews për Probizz.al
