Ndërsa tregu i banesave ka prekur nivelet më të larta gjatë viteve të fundit, investimet në ndërtesa me funksion ekonomik duket se po fitojnë terren gjithashtu. Të dhënat më të fundit për lejet e ndërtimit tregojnë se në tremujorin e parë të vitit 2026 është rritur numri i projekteve të destinuara për aktivitete prodhuese, tregtare dhe turistike, duke sinjalizuar një orientim më të madh të investimeve drejt sektorëve që lidhen drejtpërdrejt me zhvillimin ekonomik.
Sipas statistikave, në periudhën Janar-Mars 2026 u miratuan 85 leje për ndërtesa jo-rezidenciale, nga 70 leje në të njëjtën periudhë të një viti më parë. Rritja prej më shumë se 21% vjen në një kohë kur ekonomia po mbështetet gjithnjë e më shumë te turizmi, industria përpunuese dhe zgjerimi i aktiviteteve tregtare, sektorë që kërkojnë ambiente të reja prodhimi, magazinimi, shërbimi dhe akomodimi.
Motorët kryesorë të kësaj rritjeje janë ndërtesat industriale dhe ato tregtare. Numri i lejeve për ndërtesa industriale arriti në 35 në tremujorin e parë të vitit 2026, nga 25 në të njëjtën periudhë të vitit të kaluar, duke shënuar një rritje prej 40%. Paralelisht, lejet për ndërtesa tregtare u rritën nga 11 në 16, ose rreth 45% më shumë në baza vjetore.
Pozitiv paraqitet edhe sektori i turizmit. Lejet për hotele dhe struktura të ngjashme arritën në 13, niveli më i lartë i regjistruar në fillim të viteve të fundit, duke konfirmuar vijimësinë e investimeve në infrastrukturën turistike. Kjo prirje përputhet me zgjerimin e aktivitetit turistik në vend dhe me kërkesën në rritje për kapacitete akomoduese.
Sipas të dhënave të INSTAT, vlera e përafërt e lejeve të ndërtimit të miratuara në tremujorin e parë të vitit aktual arriti në rreth 20.4 miliardë lekë. Pjesa më e madhe e kësaj vlere i përket ndërtesave për banim, me afro 9.47 miliardë lekë, ku dominojnë rezidencat për komunitetet. Ndërkohë, ndërtesat jo rezidenciale përfaqësojnë rreth 5.18 miliardë lekë, ndërsa vlera e lejeve për hotele vlerësohet në 2.3 miliardë lekë./Scan
