Përdorimi i telefonit gjatë drejtimit të automjetit mund të jetë shumë më i përhapur para aksidenteve nga sa tregojnë raportet zyrtare. Në këtë përfundim ka dalë një hulumtim i ri i Institutit Amerikan për Sigurinë në Autostrada (IIHS), i cili analizoi të dhëna anonime telematike nga aplikacione të drejtimit të sigurt dhe i krahasoi me raportet e policisë.
Studiuesit shqyrtuan afro 17 mijë aksidente të ndodhura në katër shtete amerikane gjatë viteve 2021–2024. Të dhënat treguan se telefoni ishte përdorur brenda 30 sekondave para rreth 7% të aksidenteve me një automjet dhe 8% të përplasjeve mes dy automjeteve. Në raportet e policisë, telefoni përmendej në më pak se 1% të rasteve.
Edhe në 10 sekondat e fundit para përplasjes, përdorimi i telefonit u evidentua në 4% të aksidenteve me një automjet dhe 5% të përplasjeve mes dy automjeteve.
Një tjetër shqetësim është përdorimi i ekranit. Studiuesit gjetën qindra raste ku shoferët kishin ndërvepruar me telefonin pak para aksidentit, ndërsa në raportet policore raste të tilla ishin shumë të rralla. Në afro 17 mijë incidente, të dhënat policore dhe ato digjitale për mënyrën e përdorimit të telefonit përputheshin vetëm në tri raste.
Rreziku nuk lidhet vetëm me telefonatat apo mesazhet. Edhe një ekran i zhbllokuar mund të tregojë se shoferi po merret me telefonin, megjithëse në disa raste mund të jetë thjesht duke përdorur navigacionin. Në një anketë tjetër të IIHS, gati një në katër shoferë pranoi se kishte parë video në telefon gjatë drejtimit të automjetit të paktën një herë gjatë muajit të fundit.
Dhe këtu qëndron rreziku më i madh: sipas studiuesve, mjaftojnë vetëm dy sekonda duke parë telefonin që rreziku për një përplasje ose një situatë gati për aksident të dyfishohet.
Hulumtimi nuk pretendon se telefoni ishte shkaku i drejtpërdrejtë i çdo aksidenti dhe as nuk përcakton fajin e shoferëve. Por diferenca e madhe mes të dhënave reale dhe asaj që regjistrohet në raportet policore tregon se problemi mund të jetë shumë më i madh nga sa kemi menduar.
Në rrugë, dy sekonda mund të duken si asgjë. Por pas timonit, ato mund të jenë gjithçka.
