Në një intervistë për rubrikën “Histori Suksesi” në kanalin youtube Probizz.al, Presidenti i grupit të sigurimeve Eurosig-Insig, Kadri Morinaj rrëfeu ecurinë e biznesit të tij përgjatë gjithë këtyre viteve si dhe sfidat që e kanë shoqëruar në çdo hap.
Në vitin 2016 ai bleu kompaninë e parë të sigurimeve në Shqipëri, “Insig”, një blerje që i kushtoi plot 16 milionë e 100 mijë euro. Z. Morinaj e quajti pa frikë këtë blerje si privatizimin më të suksessshëm të 30 viteve të fundit për qeverinë shqiptare.
Megjithatë sfida e parë me të cilin atij iu desh të përballej pas këtij investimi ishte rimëkëmbja e “Insig”, e cila pavarësisht emrit dhe markës, në momentin e blerjes kishte 20 milion euro borxhe të padeklaruara.
Për t’ia dalë, z. Morinaj tregoi se iu desh të “sakrifikonte” dy degët e “Insig” në Kosovë e Maqedoni me performancë më të dobët, për të investuar totalisht te “Insig” në Shqipëri.
Vetë ai e cilësoi këtë një lëvizje të suksesshme pasi “Insig” është tashmë një prej kompanive lider të sigurimit në Shqipëri me një rritje vjetore prej 25 përqind.
“Unë asnjëherë s’ kam pasur frikë nga leku, në ‘94 humba rreth 4-5 milionë dollarë pas falimentimit të një biznesi dhe e mblodha veten, sepse lekët i bëj unë, s’më bëjnë mua lekët”, u shpreh ai, duke lënë të kuptohet çelësin e suksesit pas çdo drame financiare.
Grupi i sigurimeve Eurosig-Insig numëron sot plot 1 milion klientë (kontrata) në vit, me një gamë shërbimesh si sigurimi i jetës, sigurimi i shëndetit, sigurimet motorrike, sigurimi gjatë aksidenteve, sigurimi i pronës, sigurmi nëpër udhëtime, sigurimi i përgjithësisë dhe së fundmi edhe sigurimi risi i përgjegjësisë për profesione të caktuara.
Përpos këtyre shifrave biznesmeni Kadri Morinaj vuri në dukje mungesën e ndërgjegjësimit të shqiptarëve për të siguruar jetën e pronën. Ai pohoi se pjesa më e madhe e sigurimeve shkon për automjetet që janë të detyrueshme, ndërkohë që u bëri thirrje të gjithë shqiptarëve të sigurojnë jetën e tyre në radhë të parë.
“Bota sot siguron edhe kordat e zërit, ndërkohë Shqipëria është vendi i fundit në rajon pas Kosovës sa i përket renditjes për sigurimet”, tha ai.
Sipas tij, sigurimi i pronës në Shqipëri duhet të bëhet i detyrueshëm, aq më tepër pas situatës së rënduar viteve të fundit me zjarret, përmbytjet, tërmetet e pandeminë.
Në fund të intervistës, z. Morina nuk la pa përmendur një tjetër ëndërr të tij që tashmë është bërë realitet.
Bëhet falë për blerjen e aksioneve të UBA Bank, një investim që ai e kishte menduar prej kohësh për shkak të njohjes së mirë të sistemeve bankare dhe jo vetëm.
Ndiqni për më tepër intervistën e plotë të realizuar nga produksioni ReachMe!/ProBizz.al/
