Nju Jorku mund të jetë shumë pranë një transformimi të madh teknologjik, ku qielli i qytetit do të mbushet me dronë për dërgesa, taksi fluturuese elektrike dhe mjete autonome që lëvizin pa shofer. Ekspertët e industrisë thonë se teknologjia tashmë ekziston, ndërsa sfida kryesore mbetet integrimi i saj në një nga qytetet më të ngarkuara dhe komplekse në botë.
Gjatë viteve të fundit, sektori i transportit ajror urban ka shënuar zhvillime të rëndësishme. Nga taksitë fluturuese autonome deri te zepelinët gjigantë me helium, kompanitë teknologjike po investojnë miliarda dollarë për të krijuar mënyra të reja transporti dhe logjistike.
Një nga projektet më të avancuara është ai i kompanisë Joby Aviation, e cila në fillim të këtij viti realizoi fluturime demonstrative mes Manhatanit dhe Aeroportit Ndërkombëtar JFK. Mjetet elektrike të kompanisë synojnë të reduktojnë ndjeshëm kohën e udhëtimit dhe trafikun e rënduar të qytetit.
Ndërkohë, kompania Skyports Infrastructure po modernizon Downtown Skyport në Manhatan, duke e përshtatur atë për operimin e avionëve elektrikë me ngritje dhe ulje vertikale (eVTOL), që konsiderohen si e ardhmja e transportit urban ajror.
Edhe sektori i dërgesave po përgatitet për ndryshime të mëdha. Wing, kompania në pronësi të Alphabet, kompania mëmë e Google, po planifikon të zgjerojë shërbimin e saj të dërgesave me dronë në të pesë lagjet e Nju Jorkut.
“Heather Rivera, drejtuese e biznesit në Wing, e përshkruan vizionin e kompanisë me një shembull të thjeshtë: ‘Imagjinoni një mbrëmje Taco Tuesday dhe kuptoni se nuk keni mish të grirë në frigorifer. Ne do të jemi mënyra më e shpejtë për t’jua sjellë atë, në mënyrë që të vazhdoni të përgatisni darkën për familjen tuaj.’”
Megjithatë, ekspertët paralajmërojnë se përpara se këto teknologji të bëhen pjesë e jetës së përditshme, duhet të zgjidhen një sërë çështjesh që lidhen me sigurinë, rregulloret, menaxhimin e trafikut ajror dhe pranimin nga publiku.
Pavarësisht sfidave, shumë kompani e konsiderojnë Nju Jorkun si terrenin ideal për të testuar dhe zhvilluar transportin e së ardhmes. Nëse projektet aktuale rezultojnë të suksesshme, brenda dekadës së ardhshme pamja e qiellit mbi qytetin mund të ndryshojë rrënjësisht, duke sjellë një epokë të re të lëvizshmërisë urbane.
Nga një ide që dikur dukej si pjesë e filmave fantastiko-shkencorë, taksitë fluturuese dhe dronët e dërgesave po afrohen gjithnjë e më shumë me realitetin. Dhe nëse ka një vend ku kjo e ardhme mund të nisë, ai vend është Nju Jorku.
