Pas ditës së djeshme ndërkombëtare të gruas, më shumë se pesëdhjetë muze francezë kanë deklaruar se do të vazhdojnë të shfaqin postera të bërë gjatë demonstratave në Iran.
Nisma, e cila do të shohë institucionet në të gjithë vendin të veshin infrastrukturat e tyre me vepra arti që lidhen me protestat, do të zgjasë gjatë gjithë muajit mars.
Që nga fillimi i trazirave të shtatorit të kaluar, institucionet kulturore iraniane janë ndalur dhe komuniteti ndërkombëtar i artit ka marrë përsipër dokumentimin e ngjarjeve.
Duke u mbështetur në ikonografinë iraniane, një komunitet artistësh ka përzier kaligrafinë persiane me stilet bashkëkohore për të ilustruar kryengritjen iraniane në rrjetet sociale. Shumë postera shfaqin imazhin e përsëritur të grave që presin flokët ose heqin hixhabet e tyre.
Llogaria @iranianwomenofgraphicdesign e ka kataloguar këtë bashkëpunim ndërkufitar në një llogari të vetme në Instagram dhe ilustrimet e ndryshme që ajo sjell së bashku kanë shërbyer si bazë për aksionin e këtij muaji në Francë.
Për Ditën Ndërkombëtare të Gruas, Atelier de Sérigraphie des Beaux-Arts de Paris dhe katër institucione pariziane (Musée d’Art Moderne de Paris, Palais de Tokyo, Beaux-Arts de Paris dhe Palais de la Porte Dorée) organizuan shpërndarjen falas të rreth 7000 posterave.
Në një deklaratë për shtyp të dërguar nga Muzeu i Artit Modern në Paris thuhet: “Duke shfaqur dhe shpërndarë këto postera, institucionet dhe strukturat kulturore po u japin shikueshmëri imazheve të kësaj lufte dhe po rikonfirmojnë mbështetjen e tyre për gratë dhe burrat iranianë përballë represionit. si dhe përkushtimin e tyre ndaj vlerave të emancipimit dhe lirisë”.
Odile Burluraux, kurator i muzeut dhe një nga nxitësit e projektit i tha Journal du Dimanche se një përpjekje si kjo nuk është parë “që nga posterat që dolën nga lëvizja ‘Je suis Charlie'”, pas sulmeve terroriste në Paris në vitin 2015.
Nga Parisi në Lyon, Lille dhe Toulouse, rebelimi i posterëve është mënyra e botës së artit për të vazhduar të tregojë solidaritet.
Burimi: Euronews
