Për periudhën janar-korrik 2024 importet e grupit “Sapuni, preparatet parëse, lubrifikues, qirinjtë” janë rritur 21% krahasuar me të njëjtën periudhë të vitit të kaluar. Në këtë periudhë janë importuar 39 milionë kg preparate larëse dhe sapunë. Kjo është sasia më e lartë e 7 mujorit që prej vitit 2019.
Shumë pluhur larës të markave të ndryshme prodhohen në vend, ndërsa nga jashtë importohet lënda e parë. Ndërsa sapunët larës vijnë nga importi.
Prodhuesit vendas pohojnë se gjatë kësaj periudhe ka rritje të kërkesës për detergjente dhe kjo ka ardhur nga shtimi i strukturave Airbnb që përdoren më së shumti nga turistët.
“Rritja e importeve është tërësisht e ndikuar nga fluksi i turistëve të huaj. `Në këtë periudhë janë shtuar shitjet e detergjenteve në paketime të vogla në supermakete dhe kjo për shkak të shtimit të apartamenteve që jepen me qira ditore. Këto struktura janë konsumatorët më të mëdhenj të detergjenteve. Ndërsa nga strukturat akomoduese, hotelet përdoren preparate profesionale”, pohoi një nga drejtuesit e kompanisë së prodhimit të detergjenteve në vend.
Nga të dhënat e marrë nga AirDna, strukturë e posaçme që mban të dhënat e tregut për qiratë ditore në platformën ndërkombëtare Airbnb për muajin Qershor në Shqipëri ishin të listuara 21,447 apartamente, vila apo shtëpi. Krahasuar me qershorin 2023 numri i tyre u shtua 39%. Ndërsa krahasuar me Qershorin 2022, listimet janë shtuar 73%.
Shtim këtë vit ka pasur edhe te net qëndrimet, e dhënë që tregon direkt fluksin e turistëve të huaj. Në total, për 6 mujorin e parë 2024 në strukturat Airbnb janë shënuar 412 mijë net të prenotuara, me rritje prej 97% në krahasim me të njëjtën periudhë të një viti më parë. Në raport me 6 mujorin e parë 2022, net qëndrimet pothuajse janë trefishuar. Për muajin Qershor u shënuan 140 mijë net të prenotuara përmes platformave Airbnb. Net qëndrimet është treguesi, që mat direkt ecurinë e turistëve të huaj në vend në strukturat akomoduese përfshirë edhe ato me qira ditore. Krahasuar me muajin qershor 2023 net qëndrimet u rritën 91%, ndërsa në raport me 2022 janë dyfishuar.
Shtimi i net qëndrimeve për 6 mujorin e parë të 2024-s, nisi që në muajt e parë të vitit. Në muajin janar netqëndrimet janë rritur 50% kundrejt janarit 2023. Progresi i rritjes së netqëndrimeve vijoi edhe për muajt në vazhdim. Për secilin muaj, si shkurt, mars dhe prill netqëndrimet u shtuan 100% krahasuar me të njëjtën periudhë të vitit paraardhës.
Pas përfundimit të sezonit turistik nga prodhuesit nënvizohet se ka rënie të kërkesës e ndikuar nga ndryshimet demografike të popullatës. Psh, në 11 mujorin 2022 importet e mallrave të grupi “sapuni, preparatet parëse, lubrifikues, qirinjtë” u ulën 7,4% krahasuar me të njëjtën periudhë të vitit paraardhës sipas të dhënave me të fundit të INSTAT.
Në atë periudhë prodhuesit raportuan se kërkesa për detergjente dhe pluhura larës ishte 20% më pak krahasuar me vitin paraardhës e ndikuar nga ndryshimet e popullatës. Kujtojmë se në atë periudhë pati edhe një rritje të çmimeve të detergjenteve deri 20% krahasuar me 2021 për shkak të shtrenjtimit të lëndës së parë në tregjet botërore nga nisja e luftës në Ukrainë.
Pavarësisht se çmimet u shtrenjtuan prodhuesit pohuan se efekti te kërkesa nuk është dhënë prej tyre, pasi në treg ka produkte me larmi çmimesh nga ato më të shtrenjtat deri më të lirat./Monitor
