Më shumë se 1 miliard fëmijë, adoleshentë dhe të rritur përballen me obezitet në mbarë botën, duke e bërë atë formën më të zakonshme të kequshqyerjes në shumë vende, sipas një analize të botuar të enjten në revistën The Lancet.
Kjo statistikë befasuese u arrit më herët se sa ishte parashikuar në vendet me të ardhura të ulëta dhe të mesme, tha në një konferencë shtypi Dr. Majid Ezzati, autor i lartë i analizës dhe profesor në Imperial College London.
“Vlerësimet e mëparshme nga Federata Botërore e Obezitetit sugjeruan se do të kishte 1 miliard njerëz që do të jetonin me obezitet deri në vitin 2030, por ky numër tashmë ishte tejkaluar në vitin 2022”, tha Ezzati.
“Ne me të vërtetë jemi befasuar nga sa shpejt kanë ndodhur gjërat,” tha ai.
Analiza e re globale, e kryer nga më shumë se 1,500 studiues nga Bashkëpunimi i Faktorit të Rrezikut të Sëmundjeve Jo të Transmetueshme dhe Organizata Botërore e Shëndetësisë, analizoi matjet e gjatësisë dhe peshës së mbi 220 milionë njerëzve nga më shumë se 190 vende.
Fëmijët dhe adoleshentët u përcaktuan si obezë ose nënpeshë bazuar në kriteret e moshës dhe gjinisë .
Analiza vlerëson se gati 880 milionë të rritur dhe 159 milionë fëmijë jetonin me obezitet në vitin 2022. Normat e obezitetit mes fëmijëve dhe adoleshentëve në mbarë botën u rritën katërfish nga viti 1990 në 2022, ndërsa normat e obezitetit tek të rriturit u dyfishuan.
Përkthyer dhe përshtatur nga CNN për Probizz.al
