Rregullatori britanik i medias, Ofcom, ka kritikuar platformat TikTok dhe YouTube, duke deklaruar se algoritmet dhe përmbajtjet e tyre nuk ofrojnë siguri të mjaftueshme për fëmijët.
Sipas një raporti të ri të publikuar nga Ofcom, të dyja platformat nuk kanë ndërmarrë masa efektive për të kufizuar përmbajtjet e dëmshme që u shfaqen përdoruesve të mitur, ndërsa kompanitë vazhdojnë të këmbëngulin se sistemet e tyre aktuale janë të sigurta.
Raporti thekson se kompani të tjera teknologjike si Meta, Snap dhe Roblox kanë pranuar të forcojnë masat mbrojtëse kundër rreziqeve të abuzimit dhe fenomenit të njohur si “grooming” online.
“Grooming” konsiderohet një formë manipulimi dhe abuzimi, ku një i rritur krijon gradualisht besim me një fëmijë ose të mitur, zakonisht përmes internetit, me qëllim shfrytëzimin seksual, emocional apo kriminal.
Sipas të dhënave të Ofcom, rreth 84% e fëmijëve të moshës 8 deri në 12 vjeç përdorin të paktën një platformë që ka kufi minimal moshe 13 vjeç, duke shtuar presionin ndaj autoriteteve britanike për vendosjen e rregullave më të ashpra mbi sigurinë online.
Drejtuesja e Ofcom, Melanie Dawes, paralajmëroi se institucioni është i gatshëm të nisë hetime formale dhe të marrë masa të forta ndaj platformave që nuk respektojnë standardet e sigurisë për fëmijët në internet.
Ndërkohë, qeveria britanike po shqyrton masa të reja për mbrojtjen e të miturve online, duke përfshirë kufizime moshe, orare të përdorimit të aplikacioneve dhe madje mundësinë e ndalimit të rrjeteve sociale për përdoruesit nën moshën 16 vjeç.
