Një analizë e re nga Laboratori i Shkencave Kompjuterike dhe Inteligjencës Artificiale i MIT (CSAIL), e udhëhequr nga profesori Antonio Torralba, ka zbuluar se rreth një në tre reklama të shfaqura në platformat më të mëdha online janë të gjeneruara nga AI, ndërsa vetëm 15% e markave bëjnë transparencë për përdorimin e teknologjisë së inteligjencës artificiale në krijimin e përmbajtjes së tyre.
Ekipi kërkimor ka analizuar më shumë se 20,000 reklama video me pagesë nga një sërë rrjetesh sociale dhe platformash reklamuese, duke përdorur metoda të avancuara të “forensics digjitale” për të identifikuar modelet e krijuara nga makina. Sipas raportit, shumica e reklamave sintetike mund të atribuohen ndaj modelit të inteligjencës artificiale të kompanisë Higgsfield, duke u bazuar në shenjat karakteristike që lë pas ky sistem: ndriçim i përsëritur në skena të ndryshme, lëvizje identike të kamerës dhe artefakte vizuale në kalimin nga një kornizë në tjetrën, elementë që nuk gjenden zakonisht në pamjet reale të xhiruara me kamera.
Një nga gjetjet më shqetësuese të studimit është se shumë nga këto reklama publikohen si të ishin realizuar tradicionalisht, pa asnjë deklarim se përmbajtja është gjeneruar nga AI. Kjo ngre pyetje serioze mbi standardet e transparencës, etikën në komunikim, dhe mënyrën se si konsumatorët mund të dallojnë midis përmbajtjes reale dhe asaj sintetike. “Publiku nuk ka ende mjetet për të kuptuar kur një video është plotësisht e gjeneruar nga makinat. Ndërkohë, kompanitë që përdorin këto mjete fitojnë avantazh të padrejtë në kosto dhe kohë prodhimi,” shprehet profesori Antonio Torralba në një koment të përfshirë në raport.
Sipas ekspertëve, mungesa e deklarimit për përdorimin e AI-së në reklama mund të çojë në humbje besimi tek konsumatori, veçanërisht në industri që mbështeten te autenticiteti vizual, si moda, kozmetika apo turizmi. Nga ana tjetër, reklamat e krijuara me AI ofrojnë ulje të ndjeshme të kostove dhe rritje të efikasitetit, duke i lejuar markave të krijojnë dhjetëra versione të personalizuara për tregje të ndryshme brenda pak orësh./ Businessmag
