31 marsi ishte afati i fundit për deklarimin e të ardhurave për individët dhe bizneset. Sipas Tatimeve janë administruar 277 mijë deklarata , të shpërndara sipas kategorive kryesore të tatimpaguesve .
103 000 deklarata i përkasin të ardhurave nga biznesi, 28 800 janë dorëzuar nga subjektet për tatimin mbi të ardhurat e korporatave, ndërsa pjesa më e madhe është kryer nga individët me 145 200 deklarata për të ardhurat personale.
Për këto të fundit, interesi ka qënë shumë i lartë gjatë javës së fundit, i nxitur edhe nga presioni për t’iu shmangur penaliteteve.
Për këtë vit, risia kryesore ishte kompensimi i prindërve me fëmijë nën moshën 18 vjeç, të cilët do të marrin për çdo fëmijë një shumë që varion nga 6000 deri në 11 mijë lekë, e lidhur me të ardhurat vjetore të vitit 2025.
Nga ana tjetër, administrata tatimore thekson se mosrespektimi i afatit shoqërohet me penalitete, duke përfshirë gjoba për deklarim të vonuar apo mosdeklarim, si dhe detyrime shtesë financiare për pagesat e kryera jashtë afatit.
