Platforma më e madhe e mesazheve në botë, WhatsApp, do të drejtohet nga një emër i ri. Will Cathcart ka njoftuar largimin nga posti i drejtuesit të aplikacionit pas gati shtatë vitesh në krye të tij, ndërsa detyrën do ta marrë sipërmarrësi indian Kunal Shah, themelues i kompanisë fintech Cred.
Në një mesazh publik, Cathcart u shpreh se WhatsApp ndodhet në pozicionin më të fortë që ka pasur ndonjëherë, duke shtuar se ky ishte momenti i duhur për t’u larguar nga drejtimi i përditshëm i platformës. Ai do të vazhdojë të ketë një rol të rëndësishëm brenda Meta-s, ku pritet të angazhohet në zhvillimin e produkteve të reja.
Ndryshimi është përshëndetur edhe nga themeluesi dhe shefi ekzekutiv i Meta-s, Mark Zuckerberg, i cili e cilësoi Kunal Shah si një nga sipërmarrësit më të rëndësishëm të teknologjisë në Indi dhe një lider me vizion global për të udhëhequr fazën e ardhshme të zhvillimit të WhatsApp.
Shah është themelues i CRED, një platformë financiare me seli në Bengaluru që shpërblen përdoruesit për pagesat në kohë të kartave të kreditit. Kompania është kthyer në një nga startup-et më të njohura fintech në Indi dhe së fundmi ka siguruar një investim prej rreth 900 milionë dollarësh nga Meta.
Emërimi i Shah vjen në një moment kyç për Meta-n, e cila synon të zgjerojë më tej aktivitetin e WhatsApp përtej mesazheve tradicionale. Kompania po investon në shërbime pagesash, komunikim biznesi, reklama, abonime dhe mjete të inteligjencës artificiale, me fokus të veçantë në tregun indian, që konsiderohet tregu më i madh i aplikacionit në botë.
Aktualisht, WhatsApp numëron mbi 3 miliardë përdorues aktivë në mbarë globin, duke mbetur aplikacioni më i përdorur i mesazheve. Analistët vlerësojnë se ardhja e Kunal Shah mund të sjellë një fokus më të madh te shërbimet financiare dhe monetizimi i platformës, duke shënuar një kapitull të ri në historinë e aplikacionit.BBC
