Bitcoin ka qenë i diskutueshëm që nga fillimi i tij në 2009, ashtu si edhe kriptovalutat e mëvonshme që pasuan pas tij.
Ndërsa kritikohet gjerësisht për paqëndrueshmërinë e tij, përdorimin e tij në transaksione të liga dhe për përdorimin e tepruar të energjisë elektrike për ta nxjerrë atë, Bitcoin po shihet nga disa, veçanërisht në botën në zhvillim, si një port i sigurt gjatë stuhive ekonomike.
Por ndërsa më shumë njerëz u drejtohen kriptove si një investim ose si një mjet shpëtimi, këto probleme janë shfaqur në një sërë kufizimesh në përdorimin e tyre.
Statusi ligjor i Bitcoin dhe altcoin-eve të tjera (monedhat alternative të Bitcoin) ndryshon ndjeshëm nga vendi në vend, ndërsa në disa, marrëdhënia mbetet për t’u përcaktuar siç duhet ose po ndryshon vazhdimisht.
Ndërsa shumica e vendeve nuk e bëjnë të paligjshëm përdorimin e vetë Bitcoin, statusi i tij si mjet pagese ose si mall ndryshon me implikime të ndryshme rregullatore.
Disa vende kanë vendosur kufizime në mënyrën se si mund të përdoret Bitcoin, me bankat që ndalojnë klientët e tij të bëjnë transaksione me kriptomonedha. Vende të tjera e kanë ndaluar përdorimin e Bitcoin dhe kriptomonedhave me gjoba të rënda për këdo që kryen transaksione kripto.
Këto janë vendet që kanë një marrëdhënie veçanërisht të tensionuar me Bitcoin dhe altcoin të tjerë.
Algjeria
Algjeria aktualisht ndalon përdorimin e kriptomonedhës pas miratimit të një ligji financiar në vitin 2018 që e bëri të paligjshme blerjen, shitjen, përdorimin ose mbajtjen e valutave virtuale.
Bolivia
Ekziston një ndalim i plotë i përdorimit të Bitcoin në Bolivi që nga viti 2014. Banka Qendrore Boliviane nxori një rezolutë që e ndalon atë dhe çdo monedhë tjetër që nuk rregullohet nga një vend apo zonë ekonomike.
Kina
Kina ka goditur kriptovalutat me intensitet në rritje gjatë vitit 2021. Zyrtarët kinezë kanë lëshuar vazhdimisht paralajmërime për njerëzit e saj që të qëndrojnë larg tregut të aseteve digjitale dhe kanë shtrënguar ashpër minierat në vend, si dhe shkëmbimet e monedhës në Kinë dhe jashtë saj.
Më 27 gusht, Yin Youping, Zëvendës Drejtori i Byrosë Financiare për Mbrojtjen e të Drejtave të Konsumatorit të Bankës Popullore të Kinës (PBoC), iu referua kriptove si asete spekulative dhe paralajmëroi njerëzit të “mbronin xhepat e tyre”.
Përpjekjet për të minuar Bitcoin – një monedhë e decentralizuar jashtë kontrollit të qeverive dhe institucioneve – shihen kryesisht si një përpjekje nga autoritetet kineze për të nxjerrë në qarkullim monedhën e tyre elektronike.
PBoC po kërkon të jetë një nga bankat e para qendrore kryesore në botë që do të lançojë monedhën e saj digjitale dhe duke bërë këtë do të jetë në gjendje të monitorojë më nga afër transaksionet e njerëzve të saj.
Më 24 shtator, PBoC shkoi më tej dhe ndaloi plotësisht transaksionet e kriptomonedhave në vend.
Kolumbia
Në Kolumbi, institucionet financiare nuk lejohen të lehtësojnë transaksionet me Bitcoin. Superintendencia Financiera paralajmëroi institucionet financiare në vitin 2014 se ata nuk mund të “mbrojnë, investojnë, ndërmjetësojnë ose menaxhojnë operacionet e parave virtuale”.
Egjipti
Dar al-Ifta e Egjiptit, organi kryesor këshillimor islamik i vendit, nxori një dekret fetar në vitin 2018, duke i klasifikuar transaksionet e Bitcoin si “haram”, diçka e ndaluar sipas ligjit islamik. Ndonëse nuk janë të detyrueshme, ligjet bankare të Egjiptit u shtrënguan në shtator 2020 për të parandaluar tregtimin ose promovimin e kriptove pa liçensë të Bankës Qendrore.
Indonezia
Banka e Indonezisë, banka qendrore e vendit, nxori rregullore të reja që ndalojnë përdorimin e kriptomonedhave, duke përfshirë Bitcoin, si një mjet pagese nga 1 janari 2018.
Irani
Bitcoin ka një marrëdhënie komplekse me regjimin iranian. Për të shmangur ndikimin më të keq të sanksioneve ekonomike gjymtuese, Irani është kthyer në praktikën fitimprurëse të nxjerrjes së Bitcoin për të financuar importet.
Ndërsa Banka Qendrore ndalon tregtimin e kriptomonedhave të nxjerra jashtë shtetit, ajo ka inkurajuar minierat e Bitcoin në vend me stimuj.
Rreth 4.5 për qind e nxjerrjes së Bitcoin në botë ndodh në Iran, i cili, sipas firmës analitike të blockchain Elliptic, mund të përbëjë të ardhura mbi 1 miliardë dollarë (843 milionë euro).
Në mënyrë që industria e kriptove të lulëzojë, Irani u ka ofruar minatorëve të liçensuar energji të lirë, por kërkon që të gjitha kriptomat e nxjerra t’i shiten Bankës Qendrore.
Megjithatë, minierat e paliçensuara nxjerrin më shumë se 2 GW nga rrjeti kombëtar çdo ditë, duke shkaktuar mungesë të energjisë.
Për këtë qëllim, autoritetet iraniane lëshuan një ndalim katër mujor të minierave të Bitcoin deri më 22 shtator.
India
Ndërsa ende nuk ka vepruar ose nuk ka sinjalizuar synimin e saj për të ndaluar Bitcoin dhe altcoin të tjerë, India po bëhet gjithnjë e më armiqësore ndaj kriptomonedhave.
Në fillim të këtij viti, ajo konsideroi kriminalizimin e posedimit, emetimit, minierave, tregtimit dhe transferimit të aseteve kripto. Që atëherë, ky qëndrim është zbutur, me ligjvënësit që tani po shqyrtojnë një sërë rregulloresh të reja për të penguar investimet në asetet kripto në fund të nëntorit. Kjo mund të nënkuptojë se qeveria do të lejojë vetëm monedhat digjitale që janë miratuar paraprakisht nga qeveria të listohen dhe tregtohen në bursa.
Iraku
Pavarësisht përpjekjeve të vazhdueshme nga autoritetet për të bllokuar përdorimin e tyre, kriptovalutat po bëhen gjithnjë e më të njohura në Irak. Banka Qendrore e Irakut ka qenë veçanërisht armiqësore, duke lëshuar një deklaratë në vitin 2017 duke ndaluar përdorimin e tyre, e cila është ende në fuqi deri në ditët e sotme. Në fillim të vitit 2021, Ministria e Brendshme e qeverisë rajonale të Kurdistanit lëshoi udhëzime të ngjashme për të ndaluar ndërmjetësimet e parave dhe shkëmbimet që trajtojnë kriptomat.
Nepali
Banka Rastra e Nepalit e shpalli Bitcoin të paligjshëm që nga gushti 2017.
Maqedonia e Veriut
Maqedonia e Veriut është i vetmi vend evropian deri më tani që ka një ndalim zyrtar të kriptomonedhave, si Bitcoin, Ethereum dhe të tjera.
Rusia
Ndërsa kriptomonedha nuk është e jashtëligjshme në Rusi, ekziston një konflikt i vazhdueshëm që po zhvillohet kundër përdorimit të saj.
Rusia miratoi ligjet e saj të para për rregullimin e kriptove në korrik 2020, i cili për herë të parë caktoi kriptomonedhën si pronë që i nënshtrohet taksave.
Ligji, i cili hyri në fuqi në janar të këtij viti, ndalon gjithashtu nëpunësit civilë rusë të zotërojnë çdo aset kripto.
Presidenti rus Vladimir Putin e ka lidhur vazhdimisht kriptomonedhën me aktivitetin kriminal, duke bërë thirrje për vëmendje më të madhe në veçanti ndaj transaksioneve të kriptove ndërkufitare.
Në korrik, prokurori i përgjithshëm njoftoi legjislacionin e ri të propozuar, i cili do t’i lejonte policisë të konfiskojë kriptomat që konsiderohen se janë marrë në mënyrë të paligjshme duke përmendur përdorimin e tyre në ryshfet.
Turqia
Shumë në Turqi iu drejtuan kriptomonedhave pasi lira turke ra ndjeshëm në vlerë. Me disa nga nivelet më të larta të përdorimit kudo në botë, ardhja e rregulloreve ishte e shpejtë këtë vit pasi inflacioni arriti kulmin në prill.
Më 16 prill 2021, Banka Qendrore e Republikës së Turqisë nxori një rregullore që ndalonte përdorimin e kriptomonedhave duke përfshirë Bitcoin, drejtpërdrejt ose tërthorazi, për të paguar mallra dhe shërbime.
Vietnami
Banka Shtetërore e Vietnamit ka deklaruar se emetimi, furnizimi dhe përdorimi i Bitcoin dhe kriptove të tjera janë të paligjshme si një mjet pagese dhe janë subjekt i dënimit me gjoba që variojnë nga 150 milion VND (5,600 €) deri në 200 milion VND (7,445 €).
Megjithatë, qeveria nuk e ndalon tregtimin e Bitcoin ose mbajtjen e tyre si asete.
Burimi: Euronews
