Will Smith është ndaluar të marrë pjesë në Academy Awards për dekadën e ardhshme pasi goditi Chris Rock gjatë ceremonisë muajin e kaluar.
Të premten, Akademia e Arteve dhe Shkencave të Filmit e quajti sjelljen e Smith-it “të papranueshme” në një letër drejtuar anëtarëve të organizatës dhe tha se fituesi i çmimit Oscar, nuk do të lejohej në asnjë event apo program të organizuar nga grupi për 10 vjet.
“Ky veprim që po ndërmarrim sot në përgjigje të sjelljes së Will Smith është një hap drejt një qëllimi më të madh për të mbrojtur sigurinë e interpretuesve dhe të ftuarve tanë dhe për të rivendosur besimin në Akademi,” shkroi grupi në një letër drejtuar anëtarëve.
“Unë e pranoj dhe respektoj vendimin e akademisë,” tha Smith në përgjigje të ndalimit.
Smith u përball me Rockun në skenë pasi komediani bëri një shaka për flokët e Jada Pinkett Smith, gruas së Smith. Pinkett Smith vuan nga alopecia, një gjendje e lëkurës që mund të rezultojë në rënien e flokëve. Pasi goditi Rockun, Smith u kthye në vendin e tij dhe bërtiti me sharje ndaj tij.
Bordi i akademisë fillimisht ishte caktuar të mblidhej më 18 prill për të diskutuar masat e mundshme disiplinore, duke përfshirë një pezullim ose ndalim të mundshëm nga organizata. Megjithatë, javën e kaluar Smith dha dorëheqjen nga grupi duke i quajtur veprimet e tij “tronditëse, të dhimbshme dhe të pafalshme”.
Smith i kërkoi falje akademisë dhe kolegëve të tij të nominuar gjatë fjalimit të pranimit për çmimin e aktorit më të mirë, të cilin ai e fitoi për portretizimin e Richard Williams në “King Richard”. Ai i kërkoi falje Rock-ut përmes rrjeteve sociale një ditë pas ceremonisë.
Burimi: CNBC
