Një ishull i njohur për plazhet dhe historinë e tij po fiton një tjetër reputacion ndërkombëtar: atë të një prej destinacioneve më të mira gastronomike në botë. Kreta është përfshirë nga National Geographic në listën “Best of the World” për ushqimin, ndërsa është shpallur edhe Rajoni Evropian i Gastronomisë për vitin 2026.
Ishulli më i madh i Greqisë është vlerësuar për traditën e tij të kuzhinës, produktet lokale dhe lidhjen e fortë mes ushqimit, natyrës dhe mënyrës së jetesës. Në Kretë rriten rreth 40 milionë pemë ulliri, ndërsa vaji ekstra i virgjër i ullirit konsiderohet një nga produktet më të spikatura të gastronomisë së saj.
Pozicioni gjeografik i ishullit, me male, det dhe klimë të favorshme, ka krijuar një ekosistem të pasur bujqësor, ku prodhohen fruta, perime dhe produkte sezonale. Bizelet dhe shpargujt mblidhen në fillim të pranverës, ndërsa gjatë muajve të verës dominojnë domatet, patatet, kungujt dhe perimet e freskëta.
Kuzhina kreteze konsiderohet gjithashtu një nga themelet e dietës mesdhetare, e cila bazohet në ushqime me origjinë bimore, vaj ulliri, drithëra, peshk dhe konsum të kufizuar të produkteve të përpunuara. Studiuesit e lidhin këtë mënyrë ushqyerjeje me përfitime për shëndetin dhe jetëgjatësinë.
Sipas ekspertëve të gastronomisë, përvoja më autentike në Kretë nuk gjendet vetëm në zonat turistike, por në fshatrat dhe komunitetet lokale, ku recetat tradicionale dhe produktet vendase ruhen prej brezash.
Ndërkohë, edhe Shqipëria po fiton gjithnjë e më shumë vëmendje në skenën ndërkombëtare të turizmit. Artikuj të mediave të huaja e kanë renditur vendin si një destinacion në rritje për shkak të bregdetit, natyrës, trashëgimisë kulturore dhe kostove më të përballueshme krahasuar me destinacionet tradicionale evropiane./Businessmag
