Ministri i Financave dhe Ekonomisë, Ervin Mete i pranishëm në konferencën ndërkombëtare të Autoritetit të Mbikëqyrjes Financiare (AMF) “Zhvillimi i Sektorit të Sigurimeve – Mundësitë dhe Sfidat në Evropën Juglindore”, theksoi rëndësinë që ky sigurim të jetë me kosto të përballueshme për qytetarët dhe të bazohet në standardet më të mira të menaxhimit të rrezikut.
“Ka pasur një trend pozitiv zhvillimi të tregut të sigurimeve në Shqipëri përgjatë viteve të fundit, bazuar edhe mbi avancimet domethënëse ligjore dhe rregullatore, të përafruar në masë të gjerë me direktivat e BE, si edhe bazuar mbi forcimin e rolit dhe pavarësisë së Autoritetit të Mbikëqyrjes Financiare. Ashtu siç ka pasur edhe përmirësime të ndjeshme në treguesit kyç të këtij sektori, siç janë kapitali dhe mbulimi me provigjone”, u shpreh Mete.
Duke theksuar faktin se i gjithë rajoni është i ekspozuar ndaj katastrofave natyrore dhe ndryshimeve të klimës, Mete u shpreh se sigurimi nga katastrofat dhe sigurimi në bujqësi janë në vëmendje të rregullatorëve rajonalë, por edhe atyre ndërkombëtarë.
“Siç jeni në dijeni, Shqipëria u përball në vitin 2019 me një tërmet me pasoja të rënda, me efekte shkatërrimtare dhe humbje jete. Dëmet e shkaktuara u vlerësuan në rreth 1.1 miliardë euro, ose 7.5% e PBB-së. Nga këto, shoqëritë e sigurimit paguan rreth 40 milionë euro dëme për qytetarët dhe bizneset e dëmtuara. Ndërsa për pjesën tjetër, nga viti 2020 deri aktualisht, nga buxheti i shtetit janë shpenzuar afro 890 milionë euro, për procesin e rindërtimit dhe për pagesat e bonusit të qerasë. Nisur nga sa më sipër, vlerësohet i domosdoshëm përcaktimi i mekanizmave të mbrojtjes dhe transferimit të rrezikut. Ndaj, me mbështetjen e Bankës Botërore, po shqyrtojmë opsionet më të mira për zhvillimin e një programi kombëtar për sigurimin nga tërmetet. Kjo konferencë do të diskutojë më në detaje për këtë temë, por është e rëndësishme që ky sigurim të jetë me kosto të përballueshme për qytetarët dhe të bazohet në standardet më të mira të menaxhimit të rrezikut”, deklaroi ministri.
