Në Ditën Botërore të Farmacistëve flet për krenarinë, sfidat dhe ndërrimin e rolit në kujdesin shëndetësor
Data 25 shtator nuk është thjesht një ditë tjetër në kalendar për Xheni Canaj, farmaciste dhe pronare e farmacisë “Xheni” në Tiranë. Ajo është një moment simbolik i krenarisë, përkushtimit dhe reflektimit. “Krenari, sepse jemi pjesë e një profesioni thelbësor për shëndetin e njerëzve. Përkushtim sepse çdo ditë jemi aty për të ndihmuar, këshilluar dhe mbështetur pacientët tanë”, kështu i përshkruan Xheni ndjenjat që i ngjall Dita Botërore e Farmacistëve.
Një thirrje nga zemra
Me një karrierë të pasur, Xheni tregon se frymëzimi për të zgjedhur këtë profesion nuk erdhi nga një person i vetëm, por nga një kombinim i dashurisë për shkencën dhe dëshirës për t’i shërbyer direkt komunitetit. Gjithmonë kam dashur të ndihmoj njerëzit në një mënyrë shkencore dhe praktike. Farmacia ishte rruga perfekte për të bashkuar këto dy pasione”, thotë ajo.
Më shumë se një shpërndarëse ilaçesh
Duke iu përgjigjur perceptimit të përgjithshëm se farmacisti është thjesht shpërndarës i ilaçeve, Xheni Canaj sqaron se një ditë e saj është një miksim dinamik i detyrave. “Po, shpërndarja e ilaçeve është pjesë e punës, por ajo vjen pas nje procesi rigoroz kontrolli të recetës dhe dozave për të garantuar sigurinë maksimale të pacientit”shpjegon ajo. Më pas vjen pjesa më e rëndësishme: këshillimi, informimi për efektet anëore, ndërveprimi me ilaçe të tjera dhe ushqimin, këshillimi për produkte pa recetë për probleme të lehta shëndetësore.
Sfida dhe kënaqësitë: Një ekuilibër i ndjeshëm
Kur pyetet për pjesën më të vështirë të punës, Xheni thotë :“ Të jesh gjithmonë i përqëndruar në detaje të vogla, në një ambjent me kërkesa të larta, mund të jetë sfiduese. Një gabim i vogël mund të ketë pasoja të rënda. Por kjo sfidë harrohet lehtësisht përballë kënaqësisë që sjell pjesa më e bukur e punës. Marrëdhënia më pacientët, kur një pacient rikthehet dhe të falenderon”. Ajo ndan edhe një kujtim të veçantë “Kujtoj një pacient të moshuar që vinte vazhdimisht me pyetje për ilaçet e tij të shumta. Duke kaluar kohë me të për të organizuar një plan ditor të thjeshtë dhe për t’i shpjeguar qartë çdo gjë, ia lehtësova shumë jetën e përditshme”.
Roli që po zgjerohet: Nga farmacisti tek këshilltari i shëndetit
Xheni pranon se roli i farmacistit ka ndryshuar rrënjësisht me kalimin e viteve. “Mendoj se farmacisti po bëhet këshilltar i afërt i shëndetit publik. Ne jemi pikë e kontaktit për shumë njerëz. Kjo e bën komunikimin dhe ndërtimin e besimit thelbësor. Besimi ndërtohet me respekt, durim dhe dëgjim. Duhet të jesh i gatshëm të dëgjosh me kujdes problematikat e pacientëve”.
Cilësitë e një farmacisti të mirë: shkenca, empati dhe durimi
Për ata që aspirojnë të ndjekin këtë profesion. Xheni përmend disa cilësi kyçe:
-Së pari duhen njohuri shkencore
-Së dyti, të jesh i vëmendshëm ndaj detajeve, sepse puna me receta dhe doza kërkon kujdes maksimal
-Së treti dhe ndoshta jo më pak e rëndësishmja, është të jesh person empatik dhe i duruar,
Në këtë ditë të veçantë për farmacistët ajo ka dy mesazhe për kolegët dhe për lexuesit e Probizz.al
“Dua të përshëndes të gjithë kolegët e mi për përkushtimin, profesionalizmin dhe kujdesin që tregojnë çdo ditë ndaj shëndetit të komunitetit tonë. Farmacistët nuk janë thjesht shpërndarës të barnave; ne jemi këshilltarë të besuar, edukatorë për përdorimin e sigurt të medikamenteve dhe partnerë të domosdoshëm në kujdesin shëndetësor.”
Për publikun: “Kujdesi farmaceutik është gjithmonë pranë jush! Besoni farmacistin tuaj, pyesni pa hezitim dhe kujtoni se shëndeti juaj është prioriteti jonë!”
Nëpërmjet përkushtimit të farmacistëve si Xheni Canaj, farmacia shqiptare po e forcon çdo ditë pozitën e saj si një shtyllë themelore e shëndetit publik.
