Në një mbrëmje magjike në rezidencën historike Gracie Mansion në Nju Jork, piktorja shqiptare Linda Lupi shkroi një nga faqet më të bukura të karrierës së saj. Në kuadër të eventit prestigjioz “Albanian Diaspora Night”, Linda prezantoi me krenari veprat e saj para kryebashkiakut të Nju Jorkut, Eric Adams, duke e shndërruar këtë aktivitet në një festë të vërtetë të artit dhe identitetit shqiptar.
Në një gjest simbolik, Lupi i dhuroi kryebashkiakut Adams një nga pikturat e saj, një vepër që u prit me duartrokitje të ngrohta dhe respekt nga të gjithë të pranishmit, duke përfshirë figura të njohura të diasporës shqiptare nga fusha e politikës, artit, sportit dhe biznesit. Kryebashkiaku Eric Adams e quajti krijimtarinë e saj, “një perlë të mbrëmjes”.
Në një intervistë për Probizz.al ajo shpjegon pse zgjodhi New York-un për ekspozitën e saj “E Kuqja”:
“New York-un e zgjodha sepse është kryeqyteti i ëndrrave dhe i guximit artistik. Është një qytet ku arti jo thjesht ekspozohet, por jeton. ‘E Kuqja’ është një cikël që flet për pasion, identitet dhe rrënjë, dhe New York-u është vendi ideal ku zëri im artistik mund të dialogojë me botën. Të prezantoja punën time në Gracie Mansion ishte një mënyrë për ta lidhur artin shqiptar me një nga skenat më prestigjioze ndërkombëtare. Më pas, ishte një vlerësim i jashtëzakonshëm për mua që vetë kryetari aktual i Bashkisë së NewYork-ut, z. Eric Adams, e quajti krijimtarinë time ‘një perlë të mbrëmjes’. Kjo më gëzoi veçanërisht, sepse ‘e kuqja’ , ngjyra që mbart pasion, forcë dhe jetë, ishte thelbi i kësaj ekspozite”.
Por nuk ndalet këtu, artistja Linda Lupi premtoi se ekspozita e saj do të mbërrijë në disa qytete brenda dhe jashtë Shqipërisë.
“E KUQJA” është një kurim estetik që meriton të udhëtojë. ‘E Kuqja’ nuk është vetëm një ekspozitë, por një përvojë vizuale dhe emocionale që dua ta ndaj me publik të ndryshëm, në qytete të ndryshme brenda dhe jashtë Shqipërisë. Synimi është që kjo ekspozitë të udhëtojë dhe të krijojë dialog me sa më shumë njerëz”, tha për Probizz.al Linda Lupi.
Duke përmbyllur këtë natë të paharrueshme, Linda Lupi u shpreh me plot emocion: “Ishte një natë që do ta mbaj mend gjithë jetën, një natë ku ndjeva se arti im nuk flet vetëm për mua, por për gjithë shpirtin shqiptar që udhëton, krijon dhe mbetet gjithmonë krenar për origjinën e vet.”
Një moment i veçantë historik, ku “E Kuqja” e Linda Lupi ndriçoi më të ndritshmen nga qytetet e botës.
