Të punësuarit në vend kanë paguar afro 759 milionë euro deri në muajin Nëntor si tatim mbi të ardhurat personale, ku peshën më të madhe e zë tatimi i pagave sipas fashave të përcaktuara nga qeveria.
Të dhënat e Ministrisë së Financave, tregojnë se nga tatimi mbi të ardhurat personale, për periudhën Janar-Nëntor 2025, u mblodhën 15.8 miliardë lekë apo 158 milionë euro më shumë se e njëjta periudhë e një viti më parë, duke regjistruar një kapërcim prej 26.2% dhe duke u kthyer kështu në zërin me perfomancën më pozitive ndër të ardhurat e mbledhura nga administrata tatimore.
Gjithashtu edhe në raport me planin, janë mbledhur 19 milionë euro ose 0.8% më shumë parashikimi i bërë për këtë periudhë.
Sipas të dhënave zyrtare nga Ministria e Financave, kjo vlerë ka pasur një rritje progresive dhe është në nivel rekord nëse do ta krahasojmë me muajin Nëntor të dekadës së fundit.
Po ashtu edhe në 11 mujor, ka pasur një kapërcim nga viti në vit i të ardhurave nga ky zë, duke arritur në nivel rekord të kësaj dekade.
Sipas administratës tatimeve, rritja e të ardhurave nga TAP në vitin 2025 tregon se bizneset po reflektojnë për formalizim dhe për t’iu përgjigjur detyrimit ligjor.
Ndikim në perfomancë ka pasur fushata antiinformalitet e ndërmarrë nga qeveria lidhur me nëndeklarimin e pagave, duke bërë që në fazën e parë, mbi 9 mijë biznese të reagonin duke deklaruar me rritje pagat e punonjësve të tyre. Ndërsa fushata vijoi edhe më pas me një raund të dytë tek ato biznese që nuk kishin reaguar.
Nga ana tjetër vendosja e pagave të referencës në turizëm përgjatë këtij vitit, duket se ka ndikuar ndjeshëm në rritjen e pagesave të deklaruara nga ana e bizneseve në këtë sektor në sezon, duke sjellë kështu dhe rritje të detyrimeve të paguara. Një tjetër masë ishte vendosja e pagave të referencave në sektorin e ndërtimit, duke sjellë automatikisht një rritje në këtë treg dhe reflektim në tatimin e paguar.
Përgjatë dy viteve të fundit është ndërmarrë edhe reforma e rritjes së pagave në administratën publike ku paga mesatare kaloi nivelin e 900 eurove, duke bërë që edhe tatimi i paguar mbi pagën që punonjësit marrin të jetë më i lartë.
Ndërkaq, pritet perfomancë edhe më pozitive në këtë drejtim gjatë vitit të ardhshëm, duke qenë se paga minimale rritet në 500 mijë lekë dhe do të futet në fuqi skema e indeksimit të pagave për disa sektorë në nivelin 2.5 %. Të hyrat nga Tatimi mbi të ardhurat personale përfshin edhe të ardhurat mbi qiratë apo mbi interesat, por peshën më të rëndësishme e zënë ato nga pagat./Scan
