Një nga shpenzimet me të cilat përballemi çdo muaj janë edhe paratë që shkojnë për komunikimin dhe përdorimin e internetit në ofertat celulare. Por sa kushton realisht një ofertë celulare në jetën tonë të përditshme dhe si krahasohet kjo kosto me vendet e tjera të botës? Sipas analizës së “Scan Intel” dhe statistikave të Data Hub, rezulton se në Shqipëri ofertat celulare variojnë mesatarisht rreth 16 dollarë në muaj. Nëse e krahasojmë këtë nivel çmimi me vendet e tjera të rajonit, vërehet se tarifat janë pothuajse të njëjta. Në baza vjetore, kjo do të thotë se një qytetar shqiptar paguan mesatarisht rreth 192 dollarë për ofertat celulare.
Ndërkohë, në Evropë vendi me ofertat celulare më të shtrenjta është Zvicra, ku mesatarisht një ofertë kushton rreth 44 dollarë në muaj. Megjithatë, duke qenë se Zvicra ka një nivel të lartë mirëqenieje, ky çmim konsiderohet relativisht i përballueshëm për qytetarët. Edhe vendet nordike paraqiten në të njëjtën linjë, me çmime të larta për shërbimet celulare. Pas tyre renditen vendet e Ballkanit, të cilat, ndonëse nuk kanë çmimet më të larta në Europë, ofrojnë shërbime me kosto relativisht të lartë për këtë kategori.
Nëse e shohim këtë raport në shkallë globale, rezulton se Grenlanda dhe Turkmenistani janë ndër vendet me kostot më të larta të shërbimeve telefonike në botë. Kjo vjen për arsye shumë specifike. Grenlanda ka rreth 56 mijë banorë, të shpërndarë në qytete të vegjël dhe fshatra të izoluar, çka do të thotë pak klientë për të mbuluar kosto shumë të larta infrastrukturore. Për më tepër, për shkak të kushteve ekstreme të motit, shumë zona mbulohen nga lidhje satelitore dhe jo nga fibra optike, gjë që e bën internetin më të shtrenjtë dhe me kapacitet të kufizuar. Ndërsa në Turkmenistan, çmimet e larta lidhen kryesisht me faktin se operon pothuajse vetëm një operator shtetëror, pa konkurrencë reale në treg.
Nga ana tjetër, vende si India, Somalia dhe Nigeria ofrojnë paketa celulare me kosto shumë të ulët, shpesh më pak se 5 dollarë në muaj. Kjo vjen kryesisht si pasojë e numrit shumë të lartë të popullsisë, që u mundëson operatorëve të shpërndajnë kostot te një bazë e gjerë përdoruesish dhe të mbajnë çmime minimale.
