Pagat mesatare në Europë vazhdojnë të shfaqin dallime të mëdha në vitin 2025. Edhe pse hendeku ngushtohet kur merret parasysh fuqia blerëse, diferenca mes vendeve me pagat më të larta dhe atyre me më të ulëtat mbetet e thellë.
Sipas raportit “Taxing Wages 2026” të Organizatës Ekonomike për Zhvillim dhe Bashkëpunim paga mesatare bruto vjetore varion nga 18,590 euro në Turqi deri në 107,487 euro në Zvicër.
Zvicra është i vetmi vend europian ku paga mesatare bruto kalon 100 mijë euro në vit. Islanda renditet e dyta me 85,950 euro, ndërsa Lukseburgu kryeson brenda Bashkimit Europian me 77,844 euro, duke u renditur i treti në Europë. Pesëshja e vendeve me pagat më të larta plotësohet nga Danimarka me 71,961 euro dhe Hollanda me 69,028 euro. Afër tyre qëndron edhe Norvegjia me 68,420 euro. Mes pesë ekonomive më të mëdha europiane, Gjermania kryeson me 66,700 euro, e ndjekur nga Britania e Madhe me 65,340 euro.
Ndërkohë, diferenca bëhet e dukshme te vendet e tjera të mëdha të Europës: Franca regjistron 45,964 euro, Italia 36,594 euro dhe Spanja 32,678 euro. Pagat mesatare në Gjermani dhe Britani janë më shumë se dyfishi i atyre në Spanjë.
Edhe Austria, Belgjika, Irelanda, Finlanda dhe Suedia regjistrojnë paga mbi 50 mijë euro në vit.
Në anën tjetër të tabelës, Slovakia ka pagën mesatare më të ulët në BE me vetëm 19,590 euro në vit. Nëntë vende të BE-së bien nën pragun prej 30 mijë eurosh.
Raporti thekson se pagat ndikohen kryesisht nga produktiviteti ekonomik, struktura e tregut të punës dhe kostoja e jetesës. Vendet me sektorë të zhvilluar si financa dhe teknologjia priren të paguajnë më shumë, po ashtu edhe ekonomitë me sindikata të forta dhe marrëveshje kolektive pune.
Kur llogaritet fuqia blerëse (PPP), hendeku mes vendeve europiane ngushtohet ndjeshëm. Në këtë renditje, pagat variojnë nga 38,118 dollarë në Sllovaki deri në 106,532 dollarë në Zvicër.
Gjermania ngjitet ndjeshëm në renditje për sa i përket fuqisë blerëse, ndërsa Turqia rezulton vendi që fiton më shumë pozicione krahasuar me renditjen nominale./ Businessmag
