Në dukje të thjeshta, por me ndikim të madh në kulturën e punës, shprehje si “sepse unë e thashë” ose “do bëhet kështu si them unë” konsiderohen ndër mënyrat më problematike të komunikimit në lidershipin modern. Ato jo vetëm që mbyllin dialogun, por gjithashtu ndikojnë drejtpërdrejt në besimin dhe angazhimin e ekipeve, këtë qasje e ka trajtuar edhe studiuesja dhe autorja e njohur Brené Brown
Brown vëren se në shumë organizata, sidomos në vendimmarrje të vështira si kthimi në punë në zyrë pas pandemisë, komunikimi shpesh merr formën e një urdhri të padiskutueshëm. Edhe kur nuk thuhet drejtpërdrejt, mesazhi i nënkuptuar shpesh perceptohet nga punonjësit si “kështu është vendosur dhe nuk diskutohet”.
Ky stil komunikimi krijon distancë mes drejtuesve dhe ekipeve, duke ushqyer ndjesinë e hierarkisë së fortë dhe mungesës së përfshirjes në vendimmarrje.
Sipas Brown, problemi nuk qëndron vetëm te vendimi në vetvete, por te mënyra se si ai komunikohet. Kur mungon shpjegimi i arsyes pas një vendimi, rritet mosbesimi dhe zvogëlohet gatishmëria e punonjësve për t’u angazhuar.
Ndikimi në kulturën organizative
Komunikimi i bazuar vetëm në urdhra kufizon hapësirën për dialog dhe bashkëpunim. Në vend që të krijohet një proces i hapur diskutimi, vendimmarrja reduktohet në një drejtim të vetëm, nga lart-poshtë.
Në afatgjatë, kjo qasje mund të ndikojë negativisht në kulturën organizative, duke ulur motivimin, përfshirjen dhe besnikërinë e talenteve brenda kompanisë.
Një qasje më efektive në lidership
Sipas parimeve të theksuara nga Brown dhe Adam Grant, liderët efektivë nuk mjaftohen vetëm me dhënien e vendimeve, por shpjegojnë edhe arsyet që qëndrojnë pas tyre. Ata krijojnë hapësirë për pyetje, diskutim dhe reflektim.
- Kjo përfshin eksplorimin e pyetjeve të tilla si: Cilat janë bindjet që ndikojnë në këtë vendim?
- Cilat janë shqetësimet kryesore të ekipit?
- Si mund të gjenden zgjidhje që adresojnë më mirë të gjitha palët?
Një qasje e tillë ndihmon organizatat të kalojnë nga vendimmarrja e bazuar vetëm në autoritet, në një model më bashkëpunues dhe të bazuar në besim.
Mesazhi kryesor i këtij diskutimi nuk lidhet vetëm me një stil të caktuar pune, por me mënyrën se si ndërtohet kultura e lidershipit. Komunikimi i hapur dhe transparent forcon besimin dhe angazhimin e ekipeve, ndërsa qasjet autoritare si “do bëhet kështu si them unë” mund të duken efikase në moment, por shpesh dëmtojnë marrëdhëniet dhe performancën në afatgjatë./Inc
