Mbështetja e grave në sipërmarrje cilësohet si një investim me ndikim të drejtpërdrejtë në zhvillimin ekonomik dhe social të vendit. Për këtë arsye, për të dytin vit, SIGMA Vienna Insurance Group i është bashkuar programit Women Startup Albania, duke mbështetur formimin e 70 grave sipërmarrëse shqiptare përmes masterklasave. Ato janë në fazën fillestare të zhvillimit të bizneseve të tyre.
Programi synon të forcojë kapacitetet e grave themeluese të startup-eve dhe bizneseve të reja, përmes masterklasave praktike në hartimin e planeve të biznesit, prezantimin profesional përpara investitorëve dhe ndërtimin e strategjive të qëndrueshme të marketingut dhe komunikimit.
Në ekonominë tonë sipërmarrja femërore po fiton një rol gjithnjë e më të rëndësishëm, ndaj iniciativa të tilla kontribuojnë, jo vetëm në fuqizimin ekonomik të grave, por edhe në krijimin e modeleve të reja të zhvillimit dhe inovacionit në komunitet. Për SIGMA VIG, mbështetja e grave sipërmarrëse lidhet me vizionin afatgjatë për të nxitur përfshirjen, mundësitë e barabarta dhe zhvillimin e qëndrueshëm. “Mbështetja e grave që zgjedhin të ndërtojnë dhe zhvillojnë bizneset e tyre është një investim në ide, potencial dhe zhvillim afatgjatë. Përmes këtij bashkëpunimi, synojmë të kontribuojmë në krijimin e më shumë mundësive për gratë shqiptare që duan të rriten profesionalisht dhe ndikojnë pozitivisht në ekonomi dhe shoqëri”, – shprehet Dorinela Ndrejaj, Drejtore e Marketingut dhe PR në SIGMA VIG.
Në kulturën organizative të SIGMA VIG, përfshirja dhe promovimi i grave në role profesionale dhe drejtuese mbetet një element i rëndësishëm i zhvillimit të kompanisë. Kontributi dhe profesionalizmi i tyre konsiderohen pjesë kyçe e suksesit të kompanisë ndër vite.
SIGMA VIG operon në tregun shqiptar që prej vitit 1999 si një nga kompanitë e para të sigurimeve Jo-Jetë. Që prej vitit 2007, kompania është pjesë e Vienna Insurance Group, një ndër grupet lider në Austri dhe Europën Qendrore e Lindore, me mbi 200 vite histori. Sot, SIGMA VIG vazhdon të ofrojë produkte dhe zgjidhje sigurimi për individë dhe biznese, duke ndërtuar standarde europiane të sigurisë dhe besueshmërisë në tregun shqiptar./Vas-pas
