Peshqirët janë ndër sendet që përdorim çdo ditë, por rrallëherë i kushtojmë vëmendjen e duhur higjienës së tyre. Edhe pse duken të pastër, ata thithin vazhdimisht lagështi, qeliza të vdekura të lëkurës dhe baktere, duke u kthyer me kalimin e kohës në një mjedis ideal për shumimin e mikroorganizmave dhe krijimin e aromave të pakëndshme.
Ambienti i banjës, ku zakonisht mbizotërojnë lagështia dhe temperatura e ngrohtë, e përshpejton këtë proces. Për këtë arsye, ekspertët rekomandojnë që peshqirët e fytyrës të lahen më shpesh sesa ata të trupit, sidomos gjatë muajve të verës, kur djersitja është më e madhe.
Një gabim që bëjnë shumë njerëz është mënyra si i lënë peshqirët pas përdorimit. Në vend që të hidhen të mbledhur mbi vaskë ose në një cep të lagësht të banjës, ata duhet të shpalosen dhe të lihen të thahen plotësisht. Kjo ndihmon në parandalimin e aromave të pakëndshme dhe ul rrezikun e shumimit të baktereve.
Nëse peshqiri vazhdon të ketë erë edhe pas larjes, ose nëse është bërë i ashpër dhe nuk ndihet më i butë në prekje, është një shenjë se duhet larë më shpesh ose, nëse është konsumuar, zëvendësuar me një të ri.
Kujdesi për peshqirët nuk ka të bëjë vetëm me pastërtinë. Ai ndikon drejtpërdrejt edhe në shëndetin e lëkurës dhe në ruajtjen e higjienës së përditshme, ndaj një rutinë e thjeshtë e larjes dhe tharjes së tyre mund të bëjë një ndryshim të madh.
