Kostot për ndërtimin e banesave në Shqipëri vijuan rritjen edhe gjatë tremujorit të dytë të vitit 2026, por me ritme relativisht të moderuara. Të dhënat e publikuara nga INSTAT tregojnë se Indeksi i Kushtimit në Ndërtim për Banesa arriti në nivelin 114.7, duke shënuar një rritje prej 1.1% krahasuar me të njëjtën periudhë të një viti më parë. Ritmi i rritjes vjetore rezulton i njëjtë me atë të regjistruar në tremujorin e dytë të vitit 2025.
Të dhënat tregojnë se presioni kryesor mbi kostot e sektorit nuk po vjen nga materialet e ndërtimit, por nga fuqia punëtore. Në krahasim me tremujorin e dytë të vitit të kaluar, grupi “Shpenzime për paga” shënoi rritjen më të lartë, me 4.3%.
Pas pagave renditen “Kosto të tjera”, me një rritje prej 3%, shpenzimet e transportit me 1.5% dhe shpenzimet për makineri me 1.2%. Në kahun e kundërt kanë lëvizur materialet, kostot e të cilave ranë me 0.6% në terma vjetorë.
Rënia është edhe më e dukshme në disa prej kategorive specifike. Çmimet e materialeve të ndërtimit rezultuan 0.9% më të ulëta se një vit më parë, ndërsa materialet hidro-sanitare dhe të ventilimit u ulën me 0.7%. Për materialet elektrike dhe të komunikimit rënia ishte më e kufizuar, në 0.1%.
Kjo strukturë e kostove tregon një ndryshim interesant për sektorin: megjithëse materialet janë bërë mesatarisht më të lira krahasuar me një vit më parë, rritja e kostos së punës dhe e zërave të tjerë vazhdon ta mbajë indeksin e përgjithshëm në territor pozitiv.
Edhe në krahasim me tre muajt e parë të vitit, kostot e ndërtimit kanë vijuar të rriten. Në tremujorin e dytë 2026, indeksi u rrit me 0.3% kundrejt tremujorit të parë.
Përsëri, pagat dhanë sinjalin më të fortë, me një rritje tremujore prej 1.1%. Kostot e tjera u rritën me 0.8%, shpenzimet e transportit me 0.3%, materialet me 0.2% dhe shpenzimet për makineri me 0.1%.
Brenda materialeve, gjatë tremujorit të dytë pati megjithatë një rikthim të lehtë të rritjes së çmimeve. Materialet hidro-sanitare dhe të ventilimit u shtrenjtuan me 0.4% ndaj tremujorit të parë, ndërsa materialet e ndërtimit me 0.3%. Materialet elektrike dhe të komunikimit u liruan me 0.6%.
Gjithsesi, sipas shifrave, vërehet një ngadalësim i fortë të ritmit të rritjes së kostove krahasuar me nivelet e regjistruara gjatë vitit 2023. Në tremujorët e fundit, ndryshimi vjetor është stabilizuar pranë niveleve 1–1.5%.
Indeksi aktual prej 114.7 llogaritet kundrejt tremujorit të katërt 2021, që shërben si periudhë bazë me vlerën 100. Kjo nënkupton se niveli i përgjithshëm i kostove të përfshira në indeks është rreth 14.7% mbi bazën e fundit të vitit 2021.
INSTAT sqaron se Indeksi i Kushtimit në Ndërtim mat ecurinë e çmimeve të materialeve, fuqisë punëtore dhe shpenzimeve të tjera kapitale që përdoren për ndërtimin e një banese tip prej 8–10 katesh. Shporta përmban 71 zëra, prej të cilëve 66 janë materiale ndërtimi. Çmimet e materialeve mblidhen nga 237 distributorë dhe shitës me shumicë, ndërsa të dhënat për pagat, makineritë dhe transportin sigurohen nga 97 ndërmarrje të mëdha ndërtimi, të përqendruara kryesisht në Tiranë. /ekofin.al
