Italia po propozon që transaksionet me euron digjitale nën 10 euro të përjashtohen nga tarifat, me synimin për të lehtësuar kostot për bizneset e vogla.
Propozimi është pjesë e diskutimeve që po zhvillohen në Bruksel për mënyrën se si do të funksionojë euroja digjitale, një formë e re pagese që pritet të përdoret krahas parasë fizike. Nisma italiane ka marrë sinjale pozitive edhe nga Banka Qendrore Europiane.
Një nga pikat më të debatueshme është pikërisht kostoja që do të kenë tregtarët për përdorimin e kësaj mënyre pagese. Sipas analizave të BQE-së, bizneset e vogla paguajnë sot deri në tre ose katër herë më shumë tarifa sesa kompanitë e mëdha, pasi kanë më pak mundësi për të negociuar kushtet me ofruesit e shërbimeve të pagesave.
Për këtë arsye, Italia kërkon që pagesat me vlerë të ulët të jenë sa më pak të kushtueshme, ose edhe plotësisht pa tarifa. Në diskutim është edhe një alternativë tjetër: vendosja e një tarife maksimale prej vetëm 0.02 euro për transaksionet nën 10 euro.
Euroja digjitale synon gjithashtu të forcojë pavarësinë e Europës në fushën e pagesave. Aktualisht, një pjesë e madhe e pagesave elektronike në Europë kalon përmes rrjeteve amerikane, si Visa dhe Mastercard.
Banka Qendrore Europiane synon që euroja digjitale të jetë gati për emetimin e parë të mundshëm në vitin 2029, nëse rregullat përkatëse miratohen gjatë këtij viti.
Çështja e tarifave dhe ajo e shumës maksimale që qytetarët do të mund të mbajnë në portofolet digjitale do të jenë sërish në tryezë gjatë takimit të negociatorëve të vendeve anëtare, Parlamentit Europian dhe Komisionit Europian në Bruksel më 10 shtator.
