Inteligjenca artificiale mund të sjellë ndryshime të mëdha në ekonomi dhe në jetën e përditshme, por kalimi drejt një bote të drejtuar nga kjo teknologji mund të jetë i vështirë. Këtë paralajmërim ka dhënë bashkëthemeluesi i Microsoft, Bill Gates, sipas të cilit njerëzimi mund të përballet me rreth dy dekada trazirash përpara se të përfitojë plotësisht nga mundësitë që ofron AI.
Në një intervistë, Gates tha se zhvillimi i shpejtë i inteligjencës artificiale do të krijojë fitues dhe humbës, duke ndryshuar tregun e punës dhe mënyrën se si njerëzit jetojnë e punojnë. Ai theksoi se periudha e tranzicionit mund të zgjasë më pak ose më shumë se 20 vjet, në varësi të përparimeve teknologjike dhe vendimeve që do të merren nga shoqëria.Sipas tij, inteligjenca artificiale dhe robotika mund të marrin përsipër një pjesë të madhe të punëve që sot kryhen nga njerëzit, nga ndërtimi i shtëpive dhe prodhimi i ushqimit deri te disa procedura mjekësore.
Kjo mund të rrisë produktivitetin dhe të përmirësojë aksesin në shërbime, por njëkohësisht ngre pikëpyetje për të ardhmen e shumë profesioneve.Gates vlerëson se, edhe në një botë ku makineritë mund të kryejnë shumë detyra, njerëzit mund të vazhdojnë të luajnë një rol të veçantë në fusha si kujdesi për fëmijët, arti, gatimi dhe sporti. Ai sheh gjithashtu mundësi të mëdha për përdorimin e AI në shëndetësi dhe bujqësi, por paralajmëron se qeveritë nuk janë ende plotësisht të përgatitura për ritmin e zhvillimit të kësaj teknologjie.
Për këtë arsye, ai kërkon mbikëqyrje më të fortë dhe masa mbrojtëse ndaj rreziqeve, përfshirë sulmet kibernetike dhe kërcënimet biologjike.Për Gates, sfida nuk është vetëm se çfarë mund të bëjë inteligjenca artificiale, por edhe mënyra se si njerëzimi do të zgjedhë ta përdorë atë. Sipas tij, vendimet që merren sot do të ndikojnë drejtpërdrejt në mënyrën se si do të duket shoqëria në të ardhmen.
