Administrata Tatimore ka shtuar kontrollet ndaj individëve me pasuri dhe të ardhura të larta, të cilët konsiderohen kategori me rrezik të shtuar për mosdeklarimin e të ardhurave dhe shmangien e detyrimeve tatimore.
Sipas të dhënave të publikuara nga Drejtoria e Përgjithshme e Tatimeve, gjatë periudhës 2025 – 30 qershor 2026 janë audituar 129 individë. Nga këto kontrolle janë evidentuar parregullsi me një vlerë totale prej rreth 770 mijë eurosh.
Paralelisht, vetëm gjatë vitit 2026 janë nisur edhe 144 auditime të reja, të cilat ndodhen në faza të ndryshme të procesit të verifikimit.
Objektivi i Administratës Tatimore është që deri më 31 dhjetor 2026 të përfundojnë gjithsej 200 auditime ndaj individëve me pasuri të larta. Kontrollet fokusohen në rastet ku konstatohet mospërputhje mes pasurisë së zotëruar, nivelit të shpenzimeve dhe të ardhurave të deklaruara.
Ky është një zhvillim i ri në qasjen e Administratës Tatimore, pasi për herë të parë kontrolli po përqendrohet në mënyrë të dedikuar te individët me të ardhura dhe pasuri të larta, me synimin për të rritur përmbushjen vullnetare të detyrimeve tatimore dhe për të luftuar evazionin fiskal.
