Thomas Kelly ëndërronte të bëhej mjek që fëmijë, por realiteti i profesionit e përballi shpejt me një të vërtetë të ashpër: orë të gjata, dhjetëra pacientë në ditë dhe një ngarkesë administrative që linte pak hapësirë për kujdesin njerëzor. Pas vetëm pak vitesh në profesion, ai përjetoi atë që shumë mjekë e njohin mirë, djegien profesionale.
“I kisha vetëm 10 minuta për çdo pacient dhe qindra detyra për të koordinuar çdo ditë,” tregon Kelly. Sipas tij, sistemi e bënte të pamundur të ndërtonte marrëdhënie reale me pacientët, ashtu siç e kishte imagjinuar kur zgjodhi këtë profesion.
I frymëzuar nga ky problem, Kelly vendosi të kërkojë një zgjidhje jashtë mjekësisë tradicionale. Ai nisi të zhvillojë një mjet me inteligjencë artificiale që transkripton vizitat mjekësore dhe krijon automatikisht shënime klinike, duke lehtësuar barrën administrative për mjekët.
Sot, në moshën 33-vjeçare, Kelly është bashkëthemelues dhe CEO i “Heidi”, një asistent mjekësor me AI. Kompania njoftoi së fundmi një raund financimi prej 65 milionë dollarësh, duke e çuar vlerën e saj në rreth 465 milionë dollarë.
Rruga drejt suksesit nuk ishte e drejtpërdrejtë. Gjatë studimeve për mjekësi në Universitetin e Melburnit, Kelly nisi një aktivitet paralel duke ndihmuar studentë të tjerë përmes videove edukative dhe tutorimit online. Për të menaxhuar më mirë kohën, ai eksperimentoi me mjete të inteligjencës artificiale, një hap që, pa e ditur, do të shënonte kthesën e karrierës së tij.
Në vitin 2021, ai mori vendimin më të vështirë: të linte përfundimisht mjekësinë dhe t’i përkushtohej plotësisht ndërtimit të “Heidi”. “Do të pendohem gjithë jetën nëse nuk e provoj,” kujton ai mendimin që e shtyu të hidhte hapin.
Sot, mjeti i tij përdoret për të ndihmuar mjekët të përqendrohen më shumë tek pacientët dhe më pak tek dokumentacioni, ndërsa kompania ka tërhequr afro 100 milionë dollarë investime.
Historia e Kelly është një shembull i qartë se si një krizë profesionale mund të shndërrohet në një ide që ndryshon një industri të tërë, dhe një karrierë./Businessmag
