“Pemët nuk japin Wi-Fi, por na dhurojnë jetë”
Ervin Skënderi, një emër që po bëhet sinonim i angazhimit qytetar për mbrojtjen e mjedisit, ka ndërmarrë nismën e tij të dytë për mbjelljen e fidanëve, këtë herë në Krastë të Elbasanit. Pas suksesit të parë në Gramsh, ai vijon me të njëjtin pasion dhe përkushtim misionin për të gjelbëruar vendin.
Nismat e tij kanë gjithmonë një synim të qartë: frymëzimin e sa më shumë të rinjve për t’u kujdesur për natyrën. Dhe kjo nismë në Elbasan pati një impakt të jashtëzakonshëm, duke mos u kufizuar vetëm tek moshat e reja, por duke përfshirë të gjitha grupmoshat. Shumë miq të Ervinit, si brenda dhe jashtë vendit, dhanë kontributin e tyre, për çka ai ndihet mirënjohës që së bashku arritën të bëjnë diçka të bukur për natyrën.
“Ne si popull duhet të jemi shumë mirënjohës për klimën dhe natyrën e bukur që na ka falur Zoti,” thotë Ervini.
Pasioni i tij për natyrën nuk është i rastësishëm. I angazhuar edhe në organizimin e aktiviteteve sportive me makina off-road 4×4, Ervini ka zbuluar shumë vende turistike malore, çka i ka shtuar edhe më shumë dashurinë dhe pasionin për mjedisin. “Pemët ngjallin jetë,” thekson ai.
Nismës së tij iu bashkuan jo vetëm miqtë e tij të ngushtë, por edhe njerëz që ai nuk i njihte personalisht, të cilët e kontaktuan për të shprehur dëshirën për të dhënë kontributin e tyre.
Kjo ishte nisma e dytë e tij, pas asaj në qytetin e Gramshit, ku për shkak të situatës fatale me zjarret, Ervini mbolli rreth 5 mijë fidanë. Në Krastë, Elbasan, ai mbolli 2500 fidanë të tjerë. Megjithatë, ai thekson se nuk mjafton vetëm t’i mbjellësh, por duhet edhe të kujdesesh për ujitjen e tyre pas mbjelljes.
“Unë uroj që shumë të rinj dhe ne si komunitet të arrijmë të ndërgjegjësohemi për sa i përket natyrës, të kujdesemi për të dhe të merren sa më shumë nisma të tilla edhe për shumë vende të tjera,” shprehet ai.
Ervini ka edhe një moto, një refleksion që e përcjell me humor, por që mbart një të vërtetë të madhe: “Unë kam një moto: besoj se sikur pemët të na jepnin Wi-Fi, jam i sigurt që do mbillnim plot dhe do shpëtonim planetin. Por sa keq që na japin vetëm oksigjenin për të marrë frymë.”
Ky është mesazhi i tij: kur secili prej nesh i blen vetë fidanët dhe angazhohet personalisht, atëherë ndryshimi bëhet i vërtetë. Dhe Ervin Skënderi po e dëshmon këtë me çdo pemë që mbjell.
