Franca krijoi mesatarisht një milioner të ri në dollarë çdo 15 minuta gjatë vitit 2025, sipas raportit më të fundit të UBS mbi pasurinë globale. Megjithatë, në terma përqindjeje, rritjen më të shpejtë të numrit të milionerëve e regjistruan vendet e Evropës Lindore. Në nivel global, gati 1 milion persona iu shtuan klubit të milionerëve në dollarë gjatë vitit 2025. Kjo përkthehet në rreth 2.680 milionerë të rinj çdo ditë, 112 çdo orë ose pothuajse dy çdo minutë.
Evropa kontribuoi ndjeshëm në këtë rritje, menjëherë pas Shteteve të Bashkuara. Mbretëria e Bashkuar krijoi mesatarisht 118 milionerë të rinj në ditë, ndërsa Franca 95. Me kursin aktual të këmbimit, 1 milion dollarë korrespondojnë me rreth 875 mijë euro.
Evropa Lindore kryeson për ritmin e rritjes
Megjithëse ekonomitë më të mëdha shtuan më shumë milionerë në numra absolutë, vendet e Evropës Lindore regjistruan rritjen më të lartë në përqindje.
Pesë vendet e para në renditjen globale për ritmin e rritjes ishin të gjitha evropiane:
Lituania kryesoi me një rritje prej 8%, duke shtuar 921 milionerë të rinj.
Turqia u rendit e dyta me 6,4%, ose 5.650 milionerë të rinj.
Letonia shënoi një rritje prej 5,7%, me 1.131 milionerë të rinj.
Hungaria regjistroi 5,3%, duke fituar 1.349 milionerë.
Irlanda u rendit e pesta me 5,2%, por shtoi shumë më tepër milionerë në numër absolut, gjithsej 9.491.
Ndërkohë, Polonia regjistroi një rritje prej 4%, ndërsa Greqia 3,5%. Raporti thekson se ritmi i rritjes ndikohet edhe nga fakti se sa pranë pragut prej 1 milion dollarësh ndodheshin individët gjatë vitit paraardhës. Mbretëria e Bashkuar, Franca dhe Spanja pas SHBA-së për numrin e milionerëve të rinj
Në përqindje, rritja ishte:
Spanja: 3,1%
Italia: 2,4%
Mbretëria e Bashkuar: 1,8%
Franca: 1,5%
Zvicra: 1%
Gjermania: 0,9%
Megjithatë, për këto vende më domethënës janë numrat absolutë, pasi ato kanë tashmë një bazë të madhe milionerësh. Shtetet e Bashkuara kryesuan me diferencë, duke shtuar 441.078 milionerë të rinj, pothuajse gjysmën e rritjes globale.
Në Evropë:
Mbretëria e Bashkuar fitoi mbi 43.000 milionerë të rinj.
Franca dhe Spanja shtuan secila mbi 32.000 milionerë.
Italia dhe Gjermania shtuan secila mbi 24.000 milionerë, duke u renditur gjithashtu në dhjetëshen globale.
Sipas UBS, viti 2025 u karakterizua nga zgjerimi i shtresës së të pasurve në pothuajse të gjitha tregjet. “Më shumë njerëz po ngjiten në shkallët e pasurisë, numri i individëve me pasuri të lartë po rritet dhe rritja po shtrihet në një gamë të gjerë ekonomish”, thuhet në raport. Asnjë nga 56 tregjet e analizuara nga UBS nuk e mbylli vitin 2025 me më pak milionerë sesa kishte në fillim të vitit.
Ku jetojnë milionerët?
Mbi 40% e milionerëve në dollarë në botë jetojnë në Shtetet e Bashkuara, ose më shumë se 23,6 milionë persona nga rreth 57,5 milionë që përfshihen në analizën e UBS.
Evropa Perëndimore numëron afro 15 milionë milionerë, ose rreth 25% të totalit global.UBS thekson se numri i milionerëve nuk pasqyron domosdoshmërisht madhësinë e ekonomisë apo pasurinë mesatare të qytetarëve.
Në krijimin e pasurisë ndikojnë faktorë të tjerë, si:
niveli i pronësisë mbi banesat,
kursimet private për pension,
politikat fiskale që favorizojnë kursimin dhe investimin.
Raporti e përkufizon pasurinë neto si vlerën e aktiveve financiare dhe pasurive të paluajtshme në pronësi të individëve, minus detyrimet dhe borxhet e tyre./Businessmag
