GRATË SIPËRMARRËSE KOSOVË &#8211; SHQIPËRI MARRËVESHJE BASHKËPUNIMI

Gratë sipëramrrëse në Shqipëri dhe Kosovë angazhohen të zhvillojnë më tej marrëdhëniet ekonomike mes dy vendeve, duke fuqizuar gratë në biznes në të dy vendet.

Në Prishinë pati një mision biznesi të grave sipërmarrëse të fushave të ndryshme nga Shqipëria dhe Kosova. Në këtë event të përbashkët, Kryetarja e Dhomës Ekonomike të Gruas në Shqipëri (WECA), Antonela Hako dhe Drejtorja Ekzekutive e Dhomës Ekonomike të Kosovës (G7) Linda Shala, nënshkruan një marrëveshje bashkëpunimi. Kjo marrëveshje zyrtarizon bashkëpunimin e nisur, ende pa u krijuar Dhoma në Shqipëri, ku zonjat sipërmarrëse të Kosovës dhanë një mbështetje të veçantë.

Marrëveshja synon të nxisë projektet e përbashkëta në zhvillimin e tregut dhe fuqizimin e gruas.
Zonja Hako theksoi se, kjo marrëveshje do të çojë më tej bashkëpunimin e nisur mes bizneseve të drejtuara nga grate. “Ky takim ofroi mundësi konkrete për gra në fushën e shërbimit dhe prodhimit. Përmes takimeve B2B sipërmarrjet mund të gjejnë mundësi të reja në një epokë tërësisht të re”, tha Hako.

Zonja Shala, theksoi nga ana e saj se, “të dy vendet duhet të shfrytëzojnë momentin kur tregjet europiane po ikin nga lindja e largët dhe Ballkani perëndimor është një mundësi për të siguruar punë të reja për gratë sipërmarrëse dhe gratë punonjëse”.
Pas nënshkrimit të marrëveshjes, rreth 40 gra nga Kosova dhe Shqipëria zhvilluan takime B2B. Gjatë kësaj dite dinamike, Bordi i Dhomës Ekonomike të Gruas u prit edhe nga Ambasadori i Shqipërisë në Kosovë, z. Qemal Minxhozi.

Ai ofroi gatishmërinë e tij të mbështetjes për fuqizimin e gruas, veçanërisht në zonat ndërkufitare. Aktualisht në Kosovë ka disa sipërmarrje të drejtuara nga gratë nga Shqipëria, të cilat kanë përfaqësitë dhe degët e tyre atje. Me programet e bashkëpunimit mes dy Dhomave synohet të rritet numri i bizneseve të ndërsjellta në të dy vendet, por edhe sipërmarrjet e përbashkëta.Ky takim pritet të pasohet nga një konferencë për sipërmarrjet e grave në biznes gjatë muajit Shtator, ku presim të shohim edhe frytet e para të bashkëpunimit. Vëmendja tek gruaja sipërmarrëse është e rëndësishme sot, pas efekteve të pandemisë. Të dhënat zyrtare të INSTAT tregojnë se pesha e bizneseve të drejtuara nga gratë në biznes, përveç se ishte e ulët, është ulur më tej gjatë pandemisë. Ajo ka zbritur në dy vitet e fundit nga 29% e totalit të biznesit në rreth 25%.
Në njoftimin e shpërndarë nga Dhoma Ekonomike e gruas në Shqipëri thuhet se objektivi i dy Dhomave është fuqizimi i grave, përmes ndarjes së informacionit për tregjet, zhvillimit të panaireve, projekteve dhe trajnimeve të përbashkëta.Memorandumi i Mirëkuptimit përfshin bashkëpunimin institucional për të vendosur marrëdhënie të ndërsjellta midis biznesve të të dyja vendeve. Ky memorandum mirëkuptimi, ka për qëllim bashkëpunimin reciprok për hartimin, shkrimin, implementimin dhe menaxhimin e projekteve të përbashkëta rajonale dhe europiane.
Krijimi i bashkëpunimit për zgjerimin e tregut, import-eksportit mes anëtarëve të dy Dhomave, duke nxitur aktivitete dhe përmirësime të ndryshme ligjore mes G7 dhe WECA.