Sistemi i Hyrjes dhe Daljes (EES) në Bashkimin Evropian, që ka të bëjë me të gjithë shtetasit e vendeve të treta që hyjnë dhe dalin nga Zona Shengen, ka hyrë në fuqi të premten në aeroportet e 29 vendeve të BE.
Ky është një proces i regjistrimit të të dhënave personale dhe biometrike të shtetasve të vendeve të treta që udhëtojnë për një qëndrim të shkurtër deri në 90 ditë, brenda një periudhe prej 180 ditësh, sa herë që kalojnë kufijtë e jashtëm të BE-së dhe vendeve të Shengenit.
Kjo kategori përfshin gjithashtu qytetarë nga Mbretëria e Bashkuar, si dhe udhëtarët që nuk kanë nevojë për vizë, pavarësisht nëse udhëtojnë për arsye turizmi apo biznesi. Kjo vlen edhe për personat që zotërojnë pasuri të paluajtshme në BE, por nuk kanë leje qëndrimi.
Sistemi është projektuar për të zëvendësuar procesin e vulosjes së pasaportave, ndërsa të dhënat biometrike të regjistruara përfshijnë gjurmët e gishtërinjve dhe një fotografi të fytyrës. Procedura e re e kontrollit të pasaportave, të paktën gjatë fazës së parë të zbatimit të saj të detyrueshëm, do të kërkojë kohë, duke qenë se përfshin edhe intervista me pasagjerë nga vendet e treta.
Për këtë arsye, dhe për të shmangur situata të paparashikuara, pasagjerët e linjave ajrore duhet të mbërrijnë në aeroport të paktën 2 orë e 30 minuta përpara orarit të planifikuar të nisjes, në mënyrë që të përfundojnë menjëherë procedurat e regjistrimit, kontrollit të sigurisë dhe kontrollit të pasaportave, kur kërkohet.
“Travel to Europe” është aplikacioni zyrtar i BE-së i projektuar posaçërisht për sistemin EES dhe u lejon udhëtarëve të vendeve të treta të pararegjistrojnë foto biometrike dhe të dhëna pasaportash deri në 72 orë para mbërritjes së tyre, për të përshpejtuar kontrollet kufitare. Megjithatë, kjo nuk zëvendëson intervistën e kërkuar të kontrollit kufitar.
Për momentin, është i disponueshëm vetëm në disa vende, me plane për ta zgjeruar aplikacionin në të gjithë BE-në. Që nga futja në fuqi e sistemit të ri, më shumë se 24,000 personave u është mohuar hyrja në Evropë, kryesisht sepse kishin dokumente të skaduara, ose të falsifikuara, ose nuk ishin në gjendje të justifikonin mjaftueshëm qëllimin e udhëtimit të tyre. Më shumë se 600 persona janë identifikuar gjithashtu si rreziqe të mundshme për sigurinë e Evropës./SCAN
