Tirana është renditur si destinacioni më ekonomik në Europë për një pushim në qytet, sipas një analize të publikuar nga Thomas Cook, agjenci e njohur britanike në sektorin e udhëtimeve. Sipas renditjes, një turist shpenzon mesatarisht 59 euro në ditë në kryeqytetin shqiptar, duke përfshirë akomodimin, ushqimin dhe pijet dhe transportin.
Me këtë kosto, Tirana renditet në krye të listës së qyteteve europiane të analizuara për vlerën më të mirë në raport me shpenzimet, duke u pozicionuar përpara disa prej destinacioneve të njohura turistike të kontinentit.
Pas Tiranës vjen Bukureshti i Rumanisë, me një kosto ditore prej 66 eurosh për person. Antalya në Turqi dhe Varshava në Poloni ndajnë vendin e tretë, me nga 78 euro në ditë. Në vendin e pestë renditet Stambolli, me 82 euro, ndërsa Mugla dhe Krakovi ndajnë vendin e gjashtë me nga 87 euro. Vilniusi dhe Frankfurti renditen në vendin e tetë, me nga 90 euro, të ndjekur nga Lioni me 91 euro. Më tej, Tallini renditet me 93 euro, Heraklioni me 99 euro, ndërsa Porto mbyll listën me 100 euro në ditë për person.
Avantazhi i Tiranës bëhet edhe më i dukshëm në krahasim me qytetet e tjera të listës. Një ditë qëndrimi në kryeqytetin shqiptar kushton 7 euro më pak se në Bukuresht, ndërsa diferenca me Porton, qytetin më të shtrenjtë të kësaj renditjeje, arrin në 41 euro në ditë për person.
Renditja përfshin jo vetëm çmimin e hotelit, por edhe shpenzimet që një turist mund të ketë gjatë ditës, çka e bën atë një tregues më të gjerë të kostos së një udhëtimi.
Në një treg europian ku çmimi është bërë një nga faktorët kryesorë në zgjedhjen e destinacionit, Tirana shfaqet kështu si alternativa më e leverdishme për turistët që kërkojnë një pushim urban me buxhet të kontrolluar.
