Të ardhurat e larta nuk janë më garanci për siguri financiare. Një studim i ri i Goldman Sachs Asset Management zbulon një paradoks interesant në ekonominë amerikane: më shumë se një në tre persona që fitojnë mbi 300 mijë dollarë në vit deklarojnë se jetojnë nga njëra pagë te tjetra, pa arritur të krijojnë një rezervë të qëndrueshme financiare.
Sipas raportit të vitit 2026 mbi pensionet dhe sigurinë financiare, të bazuar në një anketim të zhvilluar gjatë korrikut me 5,106 të rritur amerikanë, 36% e të anketuarve me të ardhura mbi 300 mijë dollarë në vit e përshkruajnë gjendjen e tyre financiare si një cikël të vazhdueshëm shpenzimesh dhe detyrimesh që konsumojnë pjesën më të madhe të të ardhurave.
Gjetja është veçanërisht interesante sepse sfidon një bindje të përhapur: sa më shumë para fiton, aq më pak shqetësime financiare ke. Në realitet, marrëdhënia mes të ardhurave dhe sigurisë financiare rezulton shumë më komplekse.
Studimi identifikon një model në formën e shkronjës U. Tek individët që fitojnë më pak se 100 mijë dollarë në vit, 42% deklarojnë se jetojnë nga paga në pagë. Kjo përqindje zbret në 23% për grupin me të ardhura midis 100 mijë dhe 300 mijë dollarëve, por rritet përsëri në 36% tek ata që fitojnë mbi 300 mijë dollarë.
Chris Ceder, strateg i lartë për pensionet në Goldman Sachs Asset Management, e konsideron këtë një prej rezultateve më domethënëse të kërkimit. Sipas tij, siguria financiare nuk përmirësohet domosdoshmërisht në mënyrë proporcionale me rritjen e të ardhurave.
Por pse ndodh kjo?
Një shpjegim i mundshëm lidhet me fenomenin që në financat personale njihet si lifestyle inflation, ose inflacioni i stilit të jetesës. Kur të ardhurat rriten, shumë familje rrisin paralelisht edhe standardin e konsumit. Një shtëpi më e madhe, kredi më të larta, shkolla private për fëmijët, makina më të shtrenjta, udhëtime dhe shërbime të tjera bëhen gradualisht pjesë e shpenzimeve të zakonshme.
Ajo që dikur konsiderohej luks mund të kthehet në një detyrim mujor. Megjithatë, studimi nuk përcakton se sa prej vështirësive financiare të të ardhurave të larta shkaktohen konkretisht nga ky fenomen
Të dhënat mbi kartat e kreditit tregojnë gjithashtu një situatë shqetësuese. Rreth 40% e punonjësve që fitojnë më pak se 100 mijë dollarë deklarojnë se paguajnë vetëm shumën minimale të kërkuar për kartën e kreditit, ose edhe më pak. Kjo përqindje zbret në 35% për grupin me të ardhura mesatare dhe rritet në 42% për ata që fitojnë mbi 300 mijë dollarë.
Situata bëhet edhe më e pazakontë në kategorinë e të ardhurave mbi 500 mijë dollarë. Gati gjysma e të anketuarve në këtë grup deklarojnë se gjatë vitit kanë kryer vetëm pagesën minimale të kartës së kreditit, krahasuar me 39% një vit më parë.
Një tjetër tregues i rëndësishëm lidhet me objektivat financiare afatgjata. Pothuajse 70% e amerikanëve të anketuar deklarojnë se kanë shtyrë së fundmi një objektiv të rëndësishëm financiar, si kursimet për pension, blerjen e një shtëpie apo një investim tjetër madhor.
Kjo nuk do të thotë se një familje që fiton 500 mijë dollarë përballet me të njëjtat vështirësi materiale si një familje që jeton me 50 mijë dollarë. Diferencat në mundësi, pasuri dhe kapacitet për të përballuar emergjencat mbeten të konsiderueshme. Por rezultatet tregojnë se presioni financiar mund të ekzistojë në nivele shumë të ndryshme të të ardhurave.
Për ekonomistët dhe ekspertët e financave personale, ky është një sinjal se matja e mirëqenies vetëm përmes pagës apo të ardhurave vjetore mund të jetë e pamjaftueshme. Aftësia për të kursyer, niveli i borxhit, shpenzimet fikse dhe pasuria neto janë po aq të rëndësishme për të kuptuar sigurinë reale financiare.
Në fund, studimi i Goldman Sachs ngre një çështje që shkon përtej ekonomisë amerikane: pasuria nuk përcaktohet vetëm nga sa para hyjnë në llogarinë bankare, por edhe nga sa prej tyre mbeten pasi përmbushen të gjitha detyrimet./Businessmag
