Historia e radhës në Probizz.al është për platformën e re LUNEE e cila po lidh diasporën shqiptare me vendlindjen përmes dasmave. Start -up-i i krijuar nga dy vajza shqiptare të cilat jetojnë në Zvicër synon të modernizojë përmes teknologjisë mënyrën si organizohen dasmat shqiptare duke respektuar traditën dhe kulturën shqiptare. Në një intervistë për Probizz.al themelueset e kësaj sipërmarrjeje tregojne detaje për këtë risi që ju dedikohet shqiptarëve jashtë vendit.
Probizz.al: Pse zgjodhët të krijoni një platformë për diasporën shqiptare e jo për Zvicrën?
Ideja për LUNEE lindi nga një përvojë shumë personale. Gjatë organizimit të dasmës së njërës prej themelueseve, u bë shumë e qartë sa sfiduese është planifikimi i një dasme shqiptare nga diaspora. Nga ana tjetër, edhe themeluesja tjetër i kishte parë të njëjtat probleme brenda komunitetit tone, mungesën e organizimit digjital, komunikimin e vështirë mes vendeve dhe stresin që krijon koordinimi i gjithçkaje.
Kështu lindi ideja për LUNEE, nga një nevojë reale dhe nga dëshira për të krijuar një zgjidhje moderne për çiftet shqiptare në diasporë.
Diaspora shqiptare përballet me sfida specifike: distanca, koordinimi me familjen, organizimi i qindra mysafirëve dhe gjetja e ofruesve të besueshëm në vendlindje. Pikërisht këtu pamë mungesën e një platforme të dedikuar për komunitetin tonë.
Zvicra ka shumë platforma të zhvilluara për evente, por asnjëra nuk reflekton kulturën, traditat dhe mënyrën se si shqiptarët organizojnë dasmat e tyre. Ne donim të krijonim diçka që flet gjuhën tonë në çdo kuptim.
Probizz.al: Çfarë ofron LUNEE?
LUNEE është platforma e parë gjithëpërfshirëse “all-in-one” për planifikimin e dasmave shqiptare.
Platforma bashkon në një vend gjithçka që një çift ka nevojë gjatë organizimit të dasmës: menaxhimin e listës së mysafirëve, RSVP-të, faqen personale të dasmës, komunikimin me familjen dhe gjetjen e ofruesve të shërbimeve si sallat, fotografët, dekoruesit apo muzikantët.
Qëllimi ynë është ta bëjmë gjithë procesin më të qartë, më të organizuar dhe më pak stresues për çiftet dhe familjet e tyre.
Përtej funksioneve aktuale, ne jemi vazhdimisht duke punuar në zhvillimin e veçorive të reja dhe zgjerimin e platformës. LUNEE është një projekt që evoluon bashkë me komunitetin tonë.
Për ne është shumë i rëndësishëm feedback-u i përdoruesve, sepse duam të kuptojmë realisht nevojat e çdo çifti dhe të krijojmë zgjidhje që i ndihmojnë në çdo hap të organizimit të dasmës së tyre.
LUNEE kombinon teknologjinë moderne me traditën shqiptare dhe është ndërtuar posaçërisht për realitetin e diasporës.
Probizz.al: Si keni arritur që shqiptarët t’ju kontaktojnë ju?
Që nga fillimi kemi pasur një lidhje shumë të afërt me komunitetin shqiptar në diasporë, sepse LUNEE është ndërtuar pikërisht nga brenda këtij komuniteti.
Një rol të rëndësishëm në këtë kanë luajtur edhe rrjetet sociale dhe rekomandimet nga vetë çiftet që e kanë ndarë përvojën e tyre me të tjerët. Kjo ka krijuar një besim natyral dhe një interes organik për platformën.
Përveç kësaj, ne bashkëpunojmë ngushtë me shoqata të ndryshme shqiptare në Zvicër, gjë që na ka ndihmuar të ndërtojmë një prani të qëndrueshme brenda diasporës dhe të jemi më afër komunitetit tonë.
Ky kombinim i komunitetit, bashkëpunimeve lokale dhe përvojës reale të përdoruesve ka bërë që kontaktet të vijnë në mënyrë shumë natyrale dhe të vazhdueshme.
Probizz.al: Cilat janë destinacionet që zgjedh diaspora shqiptare për këtë moment të veçantë?
Shumica e çifteve të diasporës shqiptare vazhdojnë të zgjedhin Kosovën, Shqipërinë dhe Maqedoninë e Veriut për organizimin e dasmës së tyre, pasi dëshirojnë ta festojnë këtë moment të rëndësishëm pranë familjes dhe në vendlindje..
Kohët e fundit po shohim një interes shumë të madh për lokacione që kombinojnë natyrën, luksin dhe eksperiencën moderne. Sallat dhe resortet që ofrojnë standard të lartë shërbimi janë gjithnjë e më të kërkuara nga diaspora, veçanërisht vende që mund të përballojnë organizimin e madh dhe kërkesat e diasporës.
Përmes platformës sonë, ne duam t’u japim edhe ofruesve të shërbimeve mundësinë të pozicionohen online dhe të jenë më lehtë të gjetshëm. Kemi vërejtur se shumë shërbime të shkëlqyera shpesh nuk mund të gjenden lehtë, përveç nëse dikush tashmë e njeh emrin e tyre. Pikërisht këtu LUNEE krijon një urë lidhëse mes çifteve dhe ofruesve.
Probizz.al: Shqiptarët po orientohen drejt organizimit të një dasme tradicionale apo moderne?
Po shohim një kombinim shumë interesant mes modernes dhe traditës.
Çiftet shqiptare duan gjithnjë e më shumë organizim modern, estetikë elegante dhe përvojë të personalizuar, por pa humbur elementët tradicionalë që e bëjnë dasmën shqiptare unike.
Traditat familjare, muzika, vallet dhe mikpritja vazhdojnë të kenë një rol shumë të rëndësishëm. Ndryshimi është se sot çiftet kërkojnë t’i prezantojnë këto tradita në një mënyrë më moderne dhe më të kuruar.
Kjo është edhe arsyeja pse LUNEE fokusohet në krijimin e një balance mes teknologjisë moderne dhe identitetit kulturor shqiptar.
Për themelueset e platforms LUNEE
Flutura Ademi dhe Tamane Spahiu janë dy themeluese shqiptare me background në biznes, të rritura në Zvicër. Duke jetuar mes dy kulturave, ato kanë zhvilluar një kuptim të thellë për nevojat e diasporës shqiptare, si dhe një qasje të fortë sipërmarrëse dhe digjitale.
Me LUNEE, ato kanë krijuar një platformë që qëndron pikërisht në këtë ndërthurje: mes traditës dhe modernes, mes vendlindjes dhe diasporës. Qëllimi i tyre është ta bëjnë planifikimin e dasmave për çiftet shqiptare më të thjeshtë, më të strukturuar dhe më të përshtatur me kulturën e tyre duke ofruar një zgjidhje që reflekton realisht jetën dhe nevojat e komunitetit.
