Nita Meqa, e lindur në Gjakovë është një artiste e re e cila po i jep formë ëndrrës së saj për të krijuar diçka unike. Ajo ka përfunduar studimet në degën Pikturë dhe Arteve Vizuale në Universitetin AAB në Prishtinë, ku pritet të diplomohet këtë vit.
Edhe pse gjatë viteve ka punuar me fëmijë dhe me punëtori të ndryshme, arti ka qenë gjithmonë zemra e pasionit të saj. Ideja për të hapur një biznes personal e ka shoqëruar prej kohësh, por pikërisht këtë vit ajo vendosi të nisë projektin që ka dëshiruar.
Biznesi i saj i vogël merret me personalizime artistike të shisheve të verës dhe pijeve të ndryshme,një proces që për të është shumë më tepër se thjesht dekorim. “Çdo shishe është një kanavacë e vogël,” shpjegon ajo, “ku përmes ngjyrave, detajeve të punuara me dorë dhe ideve të klientëve krijoj një dhuratë unike qoftë për dasma, ditëlindje, apo evente të veçanta.”
Personalizimet e Nitas variojnë nga dizajne elegante e minimaliste, deri te kompozime artistike të plota, duke e kthyer çdo shishe në një objekt arti që mbetet kujtim.
Përveç kësaj, ajo realizon dekore handmade, piktura me porosi, si dhe punime në xham gjatë festave, të cilat sjellin atmosferë festive dhe ngrohtësi në çdo ambient. Një dimension tjetër i krijimtarisë së saj janë muralet për hapësira të brendshme dhe të jashtme, me të cilat ajo i jep çdo muri identitet dhe frymë artistike.
“Çdo punim kërkon qetësi, përkushtim dhe kreativitet. Unë besoj fort se arti i punuar me dorë ka shpirt, dhe pikërisht këtë përpiqem t’ua jap çdo klienti një krijim të veçantë, të bërë me dashuri dhe respekt për detajin,” thekson Nita.
Biznesi i saj ka filluar në shtator 2025, dhe ajo shpreson që me punën e saj të inspirojë jo vetëm klientët, por edhe artistë të tjerë të ndjekin pasionin e tyre.
